मुंबई : संगीतकार हृदयनाथ मंगेशकर यांची प्रकृती बिघडल्याने त्यांना रुग्णालयात दाखल करण्यात आले आहे. साधारणपणे १० दिवसांत वडिलांना घरी जाण्याची परवानगी मिळेल, अशी माहिती त्यांचा मुलगा आदिनाथ मंगेशकर यांनी दिली.
लता दीनानाथ मंगेशकर पुरस्कार सोहळ्यादरम्यान आदिनाथ यांनी उपस्थितांना संबोधित करताना सांगितले की, वडील हृदयनाथ नेहमी मनोगत व्यक्त करत आणि ट्रस्टबद्दल माहिती द्यायचे, पण यावर्षी ते रुग्णालयात असल्याने त्यांना तसे करता आले नाही.’ षण्मुखानंद सभागृहात आपल्या भाषणादरम्यान आदिनाथ म्हणाले, ‘देवाच्या कृपेने ते येत्या आठ ते १० दिवसांत घरी परततील. त्यांची प्रकृती स्थिर असून त्यात सुधारणा होत आहे.’
पहिला लता दीनानाथ मंगेशकर पुरस्कार पंतप्रधान नरेंद्र मोदी यांना प्रदान करण्यात आला. या कार्यक्रमाला पंतप्रधान मोदी उपस्थित होते आणि त्यांनी हृदयनाथ मंगेशकर यांना लवकरात लवकर बरं वाटावं यासाठी शुभेच्छा देऊन भाषणाला सुरुवात केली.
