बॉलिवूड अभिनेता शर्मन जोशीचे वडिल अरविंद जोशी यांचे आज पहाटे निधन झाले. मुंबईच्या जुहूस्थित नानावटी रूग्णालयात पहाटे 3 च्या सुमारास त्यांनी अंतिम श्वास घेतला. ते 84 वर्षांचे होते. त्यांच्यामागे पत्नी, मुलगा शर्मन जोशी व मुलगी मानसी जोशी असा परिवार आहे. मानसी ही सुद्धा अभिनेत्री असून अभिनेता रोहित रॉयची पत्नी आहे.
अरविंद जोशी गुजराती रंगभूमी कलाकार आणि गुजराती नाट्यदिग्दर्शक म्हणून ओळखले जात होते. परंतु त्यांनी अनेक हिट सिनेमांत दमदार भूमिका साकारल्या होत्या. इत्तेफाक, शोले, अपमान की आग, खरीदार, ठीकाना अशा अनेक सिनेमांत त्यांनी सहाय्यक अभिनेता म्हणून भूमिका साकारल्या होत्या. अनेक हिंदी मालिकांमध्येही त्यांनी काम केले.
त्यांच्या निधनाने कलाविश्वात शोक व्यक्त केला जात आहे. अभिनेते परेश रावल यांनी अरविंद जोशी यांच्या निधनावर शोक व्यक्त करत ट्विट केले. अरविंद जोशी यांचे निधन ही भारतीय रंगभूमीची मोठी हानी आहे. एक हरहुन्नरी अभिनेता, एक मोठा नाट्यदिग्दर्शक, एक निर्मळ माणूस आपण गमावला, अशा शब्दांत त्यांनी दुःख व्यक्त केलं आहे.
Irreparable loss to Indian theatre; with grief we say goodbye to the noted actor Shri Arvind Joshi. A stalwart, a versatile actor, an accomplished thespian, are the words that come to mind when I think of his performances. My condolences to @TheShermanJoshi & family.AUM SHANTI
— Paresh Rawal (@SirPareshRawal) January 29, 2021
