मुंबई : आयपीएल 15 च्या 68 व्या सामन्यात आज राजस्थान रॉयल्स आणि चेन्नई सुपर किंग्ज हे संघ आमनेसामने असतील. हा सामना मुंबईच्या ब्रेबॉर्न स्टेडियमवर होणार आहे. राजस्थानने 13 सामने खेळले आहेत आणि 8 जिंकले आहेत आणि पॉइंट टेबलमध्ये तिसऱ्या स्थानावर आहे. त्यांचा नेट रनरेट +0.304 आहे. तर 13 सामने खेळून CSK संघ फक्त चार सामने जिंकू शकला. त्यांचा नेट रनरेट -0.206 आहे.
चेन्नई सुपर किंग्ज गेल्या वर्षीचा चॅम्पियन संघ होता. त्यांची यंदाची कामगिरी अत्यंत खराब झाली आहे. मात्र, आज चेन्नईचा यंदाच्या आयपीएल मधील अखेरचा सामना असल्यामुळे यात विजय मिळवण्याचा चेन्नईचा प्रयत्न असेल.
रादस्थान टॉप 2 मध्ये स्थान मिळवण्यासाठी मैदानात उतरेल
पॉइंट टेबलमध्ये राजस्थान रॉयल्स सध्या तिसऱ्या क्रमांकावर आहे. हा सामना जिंकून ती टॉप 2 मध्ये येण्यासाठी सर्वतोपरी प्रयत्न करेल. क्रमांक दोनसाठी लखनौ आणि राजस्थान यांच्यात सतत संघर्ष सुरू आहे. लखनौने कोलकाताविरुद्ध 2 धावांनी विजय मिळवून अव्वल 2 मध्ये आपले स्थान मजबूत केले.
मोसमातील सर्वाधिक धावा करणारा जोस बटलर आणि पर्पल कॅपधारक युझवेंद्र चहल संघाला पुन्हा पहिल्या दोनमध्ये आणण्यासाठी कोणतीही कसर सोडणार नाहीत. संघाला मोठी धावसंख्या उभारायची असेल, तर यशस्वी जैस्वालकडूनही संघाला धडाकेबाज खेळीची अपेक्षा असेल.
