भारताचा 23 वर्षीय टेनिस स्टार सुमित नागलने इतिहास रचला आहे. गेल्या सात वर्षात यूएस ओपनच्या दुसर्या फेरीत प्रवेश करणारा तो पहिलाच भारतीय ठरला. नागलचा दुसर्या फेरीत पुढचा सामना ऑस्ट्रियाच्या डॉमिनिक थीम किंवा स्पेनच्या जौम मुनारशी होईल. याआधी, सोमदेव देववर्मनने 2013 मध्ये ऑस्ट्रेलियन ओपन, फ्रेंच ओपन आणि यूएस ओपनच्या दुसर्या फेरीत प्रवेश केला होता.
यूएसचा प्रतिस्पर्धी ब्रॅडले क्लान याला मंगळवारी (1 सप्टेंबर)पराभवाची धूळ चारत नागलने यूएस ओपनच्या दुसर्या फेरीत प्रवेश केला. 6-1, 6-3, 3-6, 6-1 अशा सेटमध्ये सुमित नागलने विजय मिळवला. नागलने क्लानविरुद्ध सामन्याच्या सुरुवातीच्या दोन सेटमध्ये 6-1, 6-3 असा धमाकेदार विजय मिळवला. मात्र तिसऱ्या सेटमध्ये, क्लानने नागलवर मात केली आणि सामना उत्कंठावर्धक स्थितीत आला. त्यानंतर सुमितने पुन्हा चौथ्या सेटमध्ये बाजी मारत 6-1 अशी आघाडी मिळवली. सुमित गेल्या सात वर्षांत ग्रँड स्लॅम एकेरीतील मुख्य सामना जिंकणारा पहिला भारतीय खेळाडू ठरला आहे.
