मध्य प्रदेश विधानसभेच्या २८ जागांवर येत्या ३ नोव्हेंबर रोजी पोटनिवडणूक होणार आहे. यासाठी सर्वच नेत्यांनी आपली ताकद पणाला लावली आहे. काँग्रेसमधून भाजपच्या गोटात प्रवेश केलेले ज्योतिरादित्य सिंधिया हेदेखील आपल्या पक्षासाठी जोर लावत मैदानात उतरलेले आहेत. मात्र, एका जनसभेत ज्योतिरादित्य सिंधिया आपला पक्षच विसरले… आणि त्यांनी चक्क काँग्रेससाठीच जनतेकडे मतांची याचना केली.
शनिवारी डबरामध्ये भाजप उमेदवार इमरती देवी यांच्या समर्थनासाठी एक सभा आयोजित करण्यात आली होती. या दरम्यान ज्योतिरादित्य सिंधिया यांनीही या सभेला हजेरी लावली. याच दरम्यान हा प्रसंग घडला. ‘३ तारखेला पंजाचे बटण दाबले जाईल’ असं म्हणताना ज्योतिरादित्य सिंधिया या व्हिडिओत दिसत आहेत.
‘हात उंचावून शिवराज सिंह आणि आम्हाला हा विश्वास द्या, माझी डबराची जनता, माझी शानदार आणि जानदार डबराची जनता… ३ तारखेला हाताचा पंजा असलेलं बटण दाबेल’… असं म्हणत असतानाच ज्योतिरादित्य सिंधिया यांना आपल्या मोठ्या चुकीची जाणीव झाली. मग लगेचच त्यांनी ‘कमळाचे फूल असलेलं बटन दाबणार आणि हाताचा पंजाच्या बटणाला बोरिया बिस्तर बांधून आम्ही इथून रवाना करणार’ असं म्हणत त्यांनी यु-टर्न घेतला.
ज्योतिरादित्य सिंधिया यांचा हा व्हिडिओ सोशल मीडियावर व्हायरल झाला आहे. काँग्रेसनंही त्यांचा हा व्हिडिओ आपल्या सोशल मीडिया अकाऊंटवरून शेअर केला आहे.
सिंधिया जी,
मध्यप्रदेश की जनता विश्वास दिलाती है कि तीन तारीख़ को हाथ के पंजे वाला बटन ही दबेगा। pic.twitter.com/dGJWGxdXad— MP Congress (@INCMP) October 31, 2020
.
