बिहार : बिहारचे मुख्यमंत्री नितीश कुमार यांच्या सुरक्षेत महिनाभरात दुसऱ्यांदा हलगर्जीपणाचे प्रकरण समोर आले आहे. मंगळवारी जनसंवाद कार्यक्रमादरम्यान नालंदामध्ये बॉम्बस्फोट झाल्याची बातमी समोर आली आहे. मिळालेल्या माहितीनुसार, सिलाव येथील गांधी हायस्कूलमध्ये नितीश कुमार यांच्यापासून अवघ्या 15-18 फूट अंतरावर हा बॉम्बस्फोट करण्यात आला.
या घटनेत कोणतीही दुखापत झाल्याची माहिती नसून हा बॉम्ब फटाक्याचा असल्याचे सांगण्यात येत आहे. मात्र, नितीश कुमार यांच्या संरक्षणात तैनात असलेल्या पोलिस कर्मचाऱ्यांनी एका व्यक्तीला अटक केली आहे. याआधी एका कार्यक्रमादरम्यान मुख्यमंत्री नितीश कुमार यांना पुष्पहार अर्पण करताना एका व्यक्तीने कानशिलात लगावण्याचा प्रयत्न केला होता, त्याला तत्काळ अटक करण्यात आली होती. स्फोटानंतर घटनास्थळी एकच गोंधळ उडाला. मोठा आवाज झाल्यानंतर चेंगराचेंगरी झाली.
