जम्मू : जम्मूतील चड्ढा कॅम्पजवळ शुक्रवारी पहाटे ४ वाजता दहशतवाद्यांनी CISF च्या बसवर हल्ला केला. दहशतवाद्यांनी बसवर ग्रेनेड फेकले, या बसमध्ये १५ जवान होते. CISF ने आपल्या निवेदनात म्हटले आहे की, हल्ल्यानंतर घटनास्थळी चकमक झाली, त्यानंतर चोख प्रत्युत्तर दिल्यानंतर दहशतवादी पळवून गेले. या चकमकीत एएसआय शहीद झाल्याचे वृत्त असून १० जवान जखमी झाले आहेत.
जम्मू-काश्मीरमधील सुंजवान भागात सुरक्षा दल आणि दहशतवाद्यांमध्ये सुरू असलेल्या चकमकीत एक सुरक्षा दल शहीद झाल्याची माहिती आहे, तर 4 जवान जखमी झाले आहेत. गुरुवारी रात्री परिसराची नाकेबंदी केली होती. दरम्यान, अजूनही चकमक सुरू असून दहशतवादी घरात लपून बसले आहेत.
दरम्यान, गुरुवारी पहाटे बारामुल्ला जिल्ह्यात सुरक्षा दल आणि दहशतवाद्यांमध्ये झालेल्या चकमकीत लष्कर-ए-तैयबाचा प्रमुख कमांडर युसूफ कंत्रूसह चार दहशतवादी ठार झाले.
पंतप्रधान नरेंद्र मोदी दोन दिवसांनी सांबा जिल्ह्याच्या दौऱ्यावर येत आहेत. मात्र, त्यांच्या दौऱ्यापूर्वी या भागातील दहशतवादी कारवाया तीव्र झाल्या आहेत. सुंजवानमध्ये ज्या ठिकाणी चकमक होत आहे तिथून सांबा जवळच आहे.
