उत्तर प्रदेश : उत्तर प्रदेशमधील रामपूरमध्ये शासकीय डॉक्टरचा मृतदेह संशयास्पद परिस्थितीमध्ये आढळला आहे. हा तोच डॉ. बी. एम. नागर आहे, ज्याचा एक व्हिडिओ काही दिवसांपूर्वी व्हायरल झाला होता, ज्यात एका नर्सने प्रथम त्याच्या कानशिलात लगावली होती. त्यानंतर डॉक्टरांनी नर्सला थप्पड मारली. त्यानंतर तेथे असलेल्या लोकांनी त्यांचा वाद मिटवला होता. मात्र, हा व्हिडिओ व्हायरल झाल्यानंतर डीएमने या डॉक्टरला कामावरून हटवलं होतं, परंतु नंतर पुन्हा डॉक्टरला सेवेत घेतलं होतं.
डॉ. बी. एम. नागर यांचा मृतदेह त्यांच्या सरकारी निवासस्थानी आढळून आल्यानंतर एकच खळबळ उडाली. आरोग्य अधिकारी घटनास्थळी दाखल झाले. यानंतर या डॉक्टरचा मृतदेह खासगी रुग्णवाहिकेतून त्याच्या मूळ गावी पाठविण्याचा प्रयत्न करण्यात आला, परंतु त्यानंतर घटनास्थळी पोलिस आले आणि त्यांनी डॉक्टरचा मृतदेह सरकारी निवासस्थानीच ठेवण्यास सांगितले.
त्यानंतर डॉ. बी.एम.नागर यांचे कुटुंबीय घटनास्थळी पोहचले. विशेष म्हणजे, त्यांनी एसपीला लेखी पत्र दिले की आम्हाला मृतदेहाचे पोस्टमार्टम करायचे नाही. यानंतर मृतदेह कुटुंबीयांच्या ताब्यात देण्यात आला. परंतु, शवविच्छेदन न करता मृतदेह ताब्यात कसा देण्यात आला? हा प्रश्न उपस्थित झाला आहे. काही दिवसांपूर्वी डॉ. बी.एम.नागर यांनी आपल्या जीविताला धोका असल्याचे सांगितले होते.
या घटनेनंतर डॉ. बी.एम.नागर यांनी पोलिस अधीक्षक शुगन गौतम यांना पत्र लिहून आपल्या जीविताला धोका असल्याचे सांगितले. आता डॉक्टरचा मृतदेह संशयास्पद परिस्थितीमध्ये आढळला आहे. जिल्हा रूग्णालयाचे सीएमएस आरके मित्तल म्हणाले की, हा नैसर्गिक मृत्यू असल्याचे दिसून येत आहे, त्यांचा बीपी आणि साखर देखील बरीच वाढलेली होती. पोलिसांनी सांगितले की, त्यांच्या कुटुंबियांच्या म्हणण्यानुसार डॉक्टर, त्यांना शुगर आणि हार्टच्या समस्या होत्या, त्यांच्यावर उपचार चालू होते. त्यांचे सहकारी डॉक्टर आणि कुटुंबीयांनी देखील लिहून दिले आहे की हा नैसर्गिक मृत्यू आहे आणि यात कोणत्याही पोलिस कारवाईची आवश्यकता नाही.
