पुणे : आजच्या काळात गॅस सिलिंडर ही आपल्या मूलभूत गरजांपैकी एक गरज बनली आहे. विशेषत: शहरे आणि गावांमध्ये राहणारे लोक स्वयंपाकासाठी पूर्णपणे एलपीजी सिलिंडरवर अवलंबून आहेत. त्यामुळे अचानक सिलिंडरमधील गॅस संपून तुमची तारांबळ उडू नये, यासाठी काही उपाय करू शकता. त्यानुसार तुमच्या सिलेंडरमध्ये किती गॅस शिल्लक आहे हे आधीच कळू शकते आणि तुम्ही नवीन सिलेंडर बुक करू शकता.
तुमच्या सिलेंडरमध्ये किती गॅस आहे हे जाणून घेण्यासाठी प्रथम एक कपडा पाण्यात भिजवून ओला करा. आता या ओल्या कापडाने सिलेंडरवर जाड रेषा काढा. त्यानंतर काही मिनिटे थांबा. आता तुमच्या सिलेंडरचा जो भाग रिकामा असेल तो लवकर कोरडा होईल आणि जिथे गॅस असेल तो भाग उशिरा सुकेल. अशा प्रकारे तुम्ही तुमच्या सिलेंडरमधील गॅसच्या प्रमाणाचा सहज अंदाज लावू शकता. वास्तविक, गॅसने भरलेला भाग थंड असतो, तुलनेने सिलेंडरचा रिकामा भाग गरम असतो, त्यामुळे रिकाम्या भागातील पाणी लवकर सुकते.
याव्यतिरिक्त, अनेक वेळा आपण सिलेंडर उचलून जाणून घेण्याचा प्रयत्न करतो, परंतु या पद्धतीत आपल्याला किती गॅस शिल्लक आहे हे कळत नाही. कारण रिकामा सिलिंडरही खूप जड असतो. मात्र, सिलिंडरमध्ये किती गॅस शिल्लक आहे हे त्याचे योग्य वजन करून निश्चित केले जाऊ शकते.
