पुणे : पुण्यात एक धक्कादायक घटना समोर आली आहे. तरुणीचा पाठलाग करून तिला टिंगरेनगर येथे रस्त्यात अडविले. त्यानंतर जबरदस्तीने दुचाकीवरून खराडी परिसरात नेऊन तिच्यावर बलात्कार केला. ही घटना गुरूवारी पहाटे तीन ते चार वाजताच्या दरम्यान घडली. याप्रकरणी विश्रांतवाडी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, २० वर्षीय पीडित तरुणी खराडी परिसरातील एका कॉल सेंटरमध्ये काम करते. गुरूवारी पहाटे तीनच्या सुमारास ती दुचाकीवरून धानोरीला घरी येत होती. ती घरी निघाल्यानंतर तिचा आरोपीने पाठलाग सुरू केला. तिला टिंगरेनगर परिसरात अडविले. त्यानंतर तिला मारहाण करून त्याच्या दुचाकीवर बसविले. तरुणीला पुन्हा खराडी परिसरातील निर्मनुष्य ठिकाणी घेऊन गेला. त्या ठिकाणी आरोपीने तरुणीवर बलात्कार केला. त्यानंतर आरोपीने तिला गुंजन चौक परिसरात आणून सोडले.
पीडित तरुणीने मित्राला या घटनेची माहिती दिली. त्यानंतर त्यांनी विश्रांतवाडी पोलीस ठाण्यात दुचाकीस्वार तरुणाविरोधात तक्रार दाखल केली. या प्रकरणी अपहरण, बलात्कार, मारहाण केल्याप्रकरणी गुन्हा दाखल करण्यात आला आहे.
