पॅरिस : फ्रान्समध्ये भीषण विमान दुर्घटनेमध्ये तब्बल ५ जणांचा मृत्यू झाल्याची माहिती समोर आली आहे. एका प्रवासी विमानाने मायक्रोलाईट विमानास धडक दिल्याने ही दुर्घटना झाली. पश्चिम फ्रान्समध्ये ही घटना घडली आहे. शनिवारी संध्याकाळी ४.३०च्या सुमारास दोन विमानांमध्ये टक्कर झाली होती. या अपघातात ५ जणांचा मृत्यू झाला आहे. अपघाताची माहिती देताना सरकारी प्रवक्त्या नादिया सेगैर म्हणाल्या की, मायक्रोलाईट विमानात दोनजण प्रवास करत होते. या विमानाने डीए४० या प्रवासी विमानाला भीषण धडक दिली. या प्रवासी विमानात ३ जण प्रवास करत होते, ज्यांचा जागीच मृत्यू झाला आहे.
अपघातानंतर मायक्रोलाईट विमान एका घराजवळ पडलं तर दुसरे प्रवासी विमान निवासी भागापासून दूर अंतरावर पडले असल्याची माहिती समोर आली. दरम्यान, हवेतच भीषण धडक झाल्यामुळे या विमानांनी पेट घेतला. घटनास्थळी जवळपास ५० अग्निशमन दलाचे जवान दाखल झाले. त्यांनी कोसळलेल्या विमानाला लागलेल्या आगीवर नियंत्रण मिळवण्याचा प्रयत्न केला. काही तासांच्या प्रयत्नानंतर आगीवर नियंत्रण मिळवण्यात यश आले. सुदैवाने घराजवळ विमान पडल्यानंतर कोणालाही दुखापत झाली नसल्याची माहिती मिळत आहे. पण विमानात असलेल्या दोघांचाही मृत्यू झाला आहे.
