मुंबई : प्रसिद्ध अभिनेते नितेश पांडे यांचे हृदयविकाराच्या झटक्याने वयाच्या ५१ व्या वर्षी निधन झाले. मुंबईजवळील इगतपुरी येथे त्यांनी अखेरचा श्वास घेतला. मृत्यूच्या काही तास आधी, नितेश यांनी त्यांच्या रिसॉर्टमधून एक व्हिडिओ पोस्ट केला होता. ज्यामध्ये तो हॉलिडे एन्जॉय करताना दिसला होता. नितेश उत्तराखंडमधील अल्मोडा येथील रहिवासी होते.
नितेश पांडे यांच्या निधनाने मनोरंजन क्षेत्राला मोठा धक्का बसला आहे. हा हसरा चेहरा आज आपल्यात नाही यावर विश्वास ठेवणे चाहत्यांना कठीण जात आहे. गेल्या 25 वर्षांपासून तो भारतीय टेलिव्हिजनचा लोकप्रिय चेहरा होता.
अनुपमा शोचा मुख्य अभिनेता सुधांशू पांडे याने नितेश यांच्या निधनावर शोक व्यक्त केला आहे. दोघांमध्ये चांगले संबंध असल्याचे त्यांनी सांगितले. त्यांचा अजूनही अभिनेत्याच्या मृत्यूवर विश्वास बसत नाही. अनुपमा शो दरम्यान ते मित्र झाले. दोघेही वेब शो, चित्रपट आणि ओटीटी कंटेंटवर खूप बोलायचे. दोघांची शेवटची भेट काही दिवसांपूर्वी सेटवर झाली होती. नितेशने अनुपमा या लोकप्रिय शोमध्ये धीरज कपूरची भूमिका साकारली होती. त्याने अनुजचा मित्र म्हणून शोमध्ये एंट्री घेतली. त्याचा ट्रॅक अजूनही सिरीयलमध्ये चालू होता. नितेश पांडे यांच्या निधनाची बातमी ऐकून अनुपमा शोच्या टीमला धक्का बसला आहे.
नितेश यांनी 1990 मध्ये थिएटरमध्ये करिअरला सुरुवात केली. तो अनेक हिंदी चित्रपट आणि टीव्ही शोमध्ये दिसला. ओम शांती ओम या चित्रपटात त्याने शाहरुख खानच्या असिस्टंटची भूमिका साकारली होती. बधाई दो, रंगून, हंटर, दबंग 2, बाजी, मेरे यार की शादी है, मदारी यांसारख्या चित्रपटांमध्ये तो दिसला होता. टीव्ही शोबद्दल सांगायचे तर, त्याने प्यार का दर्द है, साया, अस्तित्व…एक प्रेम कहानी, हम लड़कियाँ, इंडियावाली माँ, हिरो-गैबे मोड ऑन मधील उत्कृष्ट काम करून सर्वांची मने जिंकली. नितेश त्याच्या दमदार आवाजासाठीही प्रसिद्ध होता. ड्रीम कॅसल प्रोडक्शन्स नावाचे त्यांचे स्वतःचे प्रोडक्शन हाऊस होते. तिथे तो रेडिओ कार्यक्रम करत असे.
वैयक्तिक आयुष्यात नितेश यांचा विवाह अश्विनी काळसेकर यांच्याशी १९९८ मध्ये झाला होता. पण हे लग्न फार काळ टिकले नाही. दोघांचा 2002 मध्ये घटस्फोट झाला. नंतर नितेशने टीव्ही अभिनेत्री अर्पिता पांडेशी लग्न केले. या दोघांची भेट टीव्ही शोच्या सेटवर झाली होती.
