केंद्र सरकारने बंदी आणलेला पबजी हा मोबाईल गेम भारतात परतणार असल्याचे नुकतेच जाहीर करण्यात आले आहे. त्यातच आता भारतात बॅन असलेलं टिकटॉक हे अॅपदेखील परतण्याची शक्यता आहे. टिकटॉकची मालकी असलेली कंपनी बाईटडान्सची सरकारसोबत बातचित सुरु आहे. कंपनीचे टिकटॉक अॅप पुन्हा भारतात लाँच करण्याचे प्रयत्न सुरु आहेत.
टिकटॉक बॅन केल्यानंतर बाईटडान्स कंपनीने त्यांच्या भारतातील एकाही कर्मचाऱ्याला नोकरीवरुन हटवलेले नाही. कंपनीचे भारतात 2000 हून अधिक कर्मचारी आहेत. सर्व लोकांच्या नोकऱ्या कायम असून कर्मचाऱ्यांना यंदा बोनसही दिला आहे. टिकटॉकचे हेड निखिल गांधी यांनी कर्मचाऱ्यांना सांगितले होते की, आपली कंपनी लवकरच भारतात परतणार आहे. त्यासाठी आम्ही मेहनत घेत असून सरकारशी बोलत आहोत.
