भारत आणि श्रीलंकेचे नौदल आज (१९ ऑक्टोबर) पासून सलग तीन दिवस २१ ऑक्टोबरपर्यंत युद्धसराव करणार आहे. हा सराव त्रिंकोमालीजवळ हिंद महासागरात होणार आहे. वर्षातून एकदा युद्धसराव करण्यासाठी भारत आणि श्रीलंका यांच्यात एक करार झाला आहे. या करारानुसार आठव्यांदा भारतीय नौदल आणि श्रीलंकेचे नौदल स्लिनेक्स युद्धाभ्यास करणार आहे. दोन्ही देशांचे नौदल उच्च दर्जाचा समन्वय राखण्यासाठी सराव करणार आहे. यात अनेक गुंतागुंतीच्या कवायती केल्या जातील.
पाणबुडी विरोधी लष्करी कारवायांसाठी तयार केलेल्या आयएनएस कामोर्ता आणि आयएनएस किल्टन या युद्धनौका भारताकडून सरावात सहभागी होतील. तसेच सरावामध्ये आधुनिक हलक्या वजनाचे ध्रुव हेलिकॉप्टर, चेतक हेलिकॉप्टर आणि डॉर्निअर विमान सहभागी होणार आहे. भारतीय नौदलाने श्रीलंकेच्या नौदलाला विकलेली सागरी गस्ती नौका एसएलएनएस सयुरा आणि श्रीलंकेत नौदल प्रशिक्षणासाठी वापरली जात असलेली एसएलएनएस गजबाहु या दोन नौका श्रीलंकेकडून युद्धसरावात सहभागी होतील. गजबाहु आधी कॅनडाच्या नौदलात कार्यरत होती. एचएमसीएस हॅलोवेल या नावाने दुसऱ्या महायुद्धात कार्यरत असलेली ही नौका नंतर कॅनडाने इस्रायलला दिली. इस्रायलने आयएनएस मिझांक नावाने ही नौका काही काळ वापरली. नंतर इस्रायलने ही नौका १९५८ मध्ये श्रीलंकेला विकली.
