पठाणकोट : पठाणकोटजवळील रणजीत सागर तलावात लष्कराचे हेलिकॉप्टर कोसळले. सुदैवाने वैमानिक आणि सह-वैमानिक सुरक्षित आहेत. एनडीआरएफ आणि पोलिसांकडून शोध व बचावकार्य सुरू आहे.
मिळालेल्या माहितीनुसार, 254 आर्मीच्या एव्हिएशन स्क्वाड्रनच्या हेलिकॉप्टरने सकाळी 10:20 वाजता मामून कॅंटमधून उड्डाण केले. हे हेलिकॉप्टर रणजीत सागर तलावावरून खूपच कमी उंचीवरून उडत होते आणि त्यानंतर ते कोसळले. पठाणकोटला लागून असलेल्या जम्मू -काश्मीर भागातील रणजीत सागर धरणाजवळ सैनिक हेलिकॉप्टरने गस्त घालत होते. धरणातील बोटी आणि गोताखोरांच्या मदतीने हेलिकॉप्टरचा शोध घेतला जात आहे. मात्र, हा भाग जास्त खोल असल्यामुळे हेलिकॉप्टरचा शोध घेणे अवघड झाले आहे.
