स्विफ्ट कार आणि खासगी बसच्या झालेल्या भीषण अपघातात पाच जणांचा मृत्यू झाला आहे. नगर-औरंगाबाद महामार्गावरील नेवासा तालुक्यात देवगड फाट्याजवळ आज (२२ फेब्रुवारी) रात्री दोनच्या सुमारास हा अपघात झाला. कारमधील पाच मृत व्यक्ती जालना जिल्ह्यातील असल्याची माहिती मिळाली आहे.
मिळालेल्या माहितीनुसार, स्विफ्ट कार औरंगाबादहून अहमदनगरकडे येत होती. या कारने देवगड फाट्याजवळ खासगी ट्रॅव्हल बसला समोरून धडक दिली. घटनेची माहिती मिळताच पोलीस घटनास्थळी दाखल झाले. पोलिसांनी कारमधील पाचही जखमींना स्थानिक ग्रामस्थांच्या मदतीने नेवासा फाट्याजवळील ग्रामीण रुग्णालयात दाखल केले. परंतु, उपचारापूर्वीच त्या सर्व जणांचा मृत्यू झाला होता. दरम्यान, बसमधील सर्वजण सुरक्षित आहेत.
