सोलापूर : सोलापूर येथील श्री मार्कंडेय रुग्णालयात मध्यरात्री ऑक्सिजनच्या टाकीचा स्फोट झाल्याची घटना घडली आहे. त्यामुळे रुग्णांमध्ये घबराट पसरली आणि गोंधळाची परिस्थिती निर्माण झाली होती. सुदैवाने या दुर्घटनेत कोणतीही जिवितहानी झाली नसल्याचं प्रशासनाकडून सांगण्यात आलं.
मिळालेल्या माहितीनुसार, श्री मार्कंडेय हॉस्पिटलच्या आवारात ऑक्सिजनचा प्लांट असून प्लांटच्या दोन टाक्या आहेत. त्यापैकी एक टाकी बंद पडलेली आहे. या बंद पडलेल्या टाकीत रासायनिक रिऍक्शन होऊन स्फोट झाला. या स्फोटामुळे टाकीच्या आत असलेली पावडर दूरपर्यंत उडून हवेत धुळीचे लोट उठले. दरम्यान, या प्रकारामुळे रुग्णालयात दाखल असलेले रुग्ण आणि त्यांचे नातेवाईक प्रचंड घाबरले होते. त्यांची धावपळ सुरु झाली होती. स्फोटाची माहिती मिळताच अग्निशमन दलाच्या दोन गाड्या घटनास्थळी दाखल झाल्या आणि त्यांनी आग नियंत्रणात आणली.
