पंढरपूर : पंढरपूरला विठ्ठल रुक्मिणी दर्शनासाठी येणाऱ्या कोल्हापूर जिल्ह्यातील चंदगड येथील भाविकांच्या बोलेरो गाडीचा भीषण अपघात झाला आहे. ही बोलेरो थांबलेल्या ट्रकला जावून धडकल्याने झालेल्या अपघातात चौघांचा दुर्दैवी मृत्यू झाला आहे. या अपघातात दोन महिला एक पुरूष आणि एक लहान मुल अशा चौघांचा जागीच मृत्यू झाला. तर एक जण गंभीर जखमी झाला आहे.
हा अपघात सकाळी सहा वाजेच्या सुमारास कासेगाव परिसरात घडला. कोल्हापुरातील चंदगड येथील 16 भाविक बोलेरो गाडीतून विठ्ठल रुक्मिणी दर्शनासाठी पंढरपूरला येत होते. पंढरपूरच्या जवळ असतानाच कासेगाव जवळच्या रस्त्यावर बोलेरो गाडीच्या चालकाचे गाडीवरील नियंत्रण सुटले आणि त्याने रस्त्यावर उभे असलेल्या ट्रकला जाऊन जोरदार धडक दिली. अपघात इतका जोरदार होता की, बोलेरोचा चेंदामेंदा झाला. जखमींना येथील शासकीय रूग्णालयात दाखल करण्यात आले आहे.