जगभरातील नागरिकांसाठी दिलासादायक बातमी आहे. यूकेच्या वैद्यकीय आणि आरोग्य नियामक मंडळाच्या शिफारशीनंतर ऑक्सफर्ड-अॅस्ट्राझेनेकाला पुन्हा आपल्या लसीची चाचणी सुरु करण्यासाठी परवानगी मिळाली आहे. मागील आठवड्यात लस टोचलेला एक स्वयंसेवक आजारी पडल्यानंतर या लसीची चाचणी थांबवण्यात आली होती. त्यानंतर भारतातील सीरम इन्स्टिट्यूटलाही चाचण्या थांबवण्यास सांगितले होते.
ऑक्सफर्ड आणि अॅस्ट्राझेनेका यांनी तयार केलेली कोरोनावरील लस तिच्या मानवी चाचणीच्या टप्प्यात असताना चाचणीत सहभागी असलेली एक व्यक्ती आजारी पडली होती. त्यामुळे या लसीची चाचणी थांबवण्यात आली होती. अॅस्ट्राझेनेकाने याबाबतची माहिती दिली होती.
या लसीला एझेडडी -1222 (AZD1222)असे नाव देण्यात आले आहे. जागतिक आरोग्य संघटनेच्या (WHO) मते, जगातील इतर लसींच्या चाचण्यांच्या तुलनेत ही लस आघाडीवर आहे. सध्या ऑक्सफोर्ड विद्यापीठाच्या लसीकडे भारतासह अनेक देशांचे लक्ष लागून आहे. या लसीच्या चाचणीच्या तिसऱ्या टप्प्यात हजारो स्वयंसेवकांचा सहभाग आहे. आता पुन्हा या लसीची चाचणी सुरु करण्यासाठी परवानगी मिळाली आहे.
