दुबई : अभिनेत्री सोनाली कुलकर्णीने कुणाल बेनोडेकरशी लग्न केलं. सोनालीने तिच्या वाढदिवसाच्याच दिवशी दुबईत ४ जणांच्या उपस्थितीत लग्न केलं. तिच्या लग्नाला तिचे आई- बाबा आणि कुणालचे आई- बाबाही नव्हते. ७ मे रोजी दोघांनी दुबईतील एका मंदिरात लग्न केलं.
सोनाली आणि कुणाल जुलै महिन्यात विवाहबद्ध होणार होते. मात्र दोघांनी अचानक मे महिन्यातच लग्न केलं. सोनालीने स्वतः सोशल मीडियावर अचानक लग्न का केलं याची सविस्तर माहिती दिली.
View this post on Instagram
अवघ्या दोन दिवसांत सोनाली आणि कुणालने लग्न करण्याचा निर्णय घेतला. एका तासात लग्नाची खरेदी केली आणि १५ मिनिटांत अवघ्या चार लोकांच्या साक्षीने मंदिरात वरमाळा, मंगळसूत्र आणि कुंकू या तीन गोष्टी घेऊन विवाह प्रमाणपत्रावर स्वाक्षऱ्या केल्या.
सोनाली आणि कुणालने लग्नासाठी वापरण्यात येणारी रक्कम कोरोना विरुद्धच्या मदतनिधीसाठी देण्याचा निश्चय केला आहे. कुणाल बेनोडेकर हा मूळचा लंडनमधील असून तो दुबईत सिनिअर अॅडजस्टर म्हणून काम करतो. गेल्या वर्षी याच दिवशी अर्थात सोनालीच्या वाढदिवसाला दोघांनी दुबईत मोजक्या लोकांच्या उपस्थितीत साखरपुडा केला होता.
