World Athletics Championships : जागतिक ऍथलेटिक्स चॅम्पियनशिप स्पर्धा सध्या अमेरिकेतील ओरेगॉन येथे सुरू आहे. टोकियो ऑलिम्पिक 2020 मध्ये भारताला पहिले ऑलिम्पिक सुवर्ण जिंकून देणाऱ्या 24 वर्षीय नीरज चोप्राने भालाफेकच्या अंतिम फेरीत चमकदार कामगिरी केली. त्याने रौप्यपदक जिंकून इतिहास रचला. 39 वर्ष जागतिक ऍथलेटिक्स चॅम्पियनशिपमध्ये सुवर्णपदक जिंकण्याचे भारताचे स्वप्न पूर्ण होऊ शकले नाही. मात्र, तब्बल 19 वर्षांनंतर या चॅम्पियनशिपमध्ये देशाला पदक मिळाले आहे. नीरजच्या आधी अंजू बॉबी जॉर्जने 2003 मध्ये लांब उडीत कांस्यपदक जिंकले होते. नीरज काही प्रयत्नात अपयशी ठरला होता. त्याने फाऊलही केले. तसे झाले नसते तर सुवर्णपदक जिंकले असते. मात्र, नीरजसाठी ही खूप मोठी उपलब्धी आहे. हा भारतासाठीही आनंदाचा क्षण आहे.
नीरज चोप्रा येथे पहिल्याच प्रयत्नात अपयशी ठरला. त्याचा पहिला फेक फाऊल घोषित करण्यात आला. त्यानंतर त्याने दुसऱ्या फेरीत ८२.३९ मीटर अंतरावर भालाफेक केली. ग्रेनेडाच्या अँडरसन पीटर्सने पहिल्याच प्रयत्नातच 90 मीटर अंतरावर भाला फेकून दबाव वाढवला. अँडरसन पीटर्सने दुसऱ्या फेरीत 90.46 मीटर भालाफेक केली. त्याचवेळी नीरजने तिसऱ्या फेरीत कामगिरीत सुधारणा करत 86.37 मीटर अंतरावर भालाफेक केली.
यानंतर नीरजचा चौथा थ्रो शानदार होता आणि त्याने 88.13 मीटर अंतरावर भालाफेक केली. इथून सुवर्णपदकासाठी नीरजला 90.46 मीटरपेक्षा जास्त भालाफेक करावी लागणार होती, पण ते होऊ शकले नाही. त्याने असे केले असते तर 39 वर्षे जुन्या जागतिक ऍथलेटिक्स चॅम्पियनशिपमधील भारताचे हे पहिले सुवर्ण ठरले असते. पाचवा आणि सहावा थ्रो नीरजचा फाऊल होता आणि त्यामुळे तो दुसऱ्या क्रमांकावर राहिला. आणि ग्रेनेडाच्या अँडरसनने सुवर्ण जिंकले.
झेक प्रजासत्ताकच्या जेकब वडलेचने 88.09 गुणांसह कांस्यपदक जिंकले. दुसरीकडे, भारताच्या रोहित यादवने अंतिम फेरीत दहावे स्थान पटकावले. तिसऱ्या फेरीनंतर तो बाहेर पडला. त्याने पहिल्या फेरीत 77.96 मीटर, दुसऱ्या फेरीत 78.05 आणि तिसऱ्या फेरीत 78.72 मीटर भालाफेक केली.
