Toyota Mirai First Hydrogen Car : आपण इलेक्ट्रिक कारवर लक्ष केंद्रित करत असतानाच देशात पहिल्या हायड्रोजन इंधनावर चालणाऱ्या कारची ओळख करून देण्यात आली आहे. देशाचे रस्ते आणि वाहतूक मंत्री नितीन गडकरी यांनी नवीन पायलट प्रोजेक्ट कार टोयोटा मिराईमध्ये प्रवास करत या दिशेने एक पाऊल पुढे टाकले आहे. टोयोटा मिराईची खास गोष्ट म्हणजे ती हायड्रोजनवर चालते, या कारमध्ये गडकरी यांचा फिरतानाचा व्हिडिओ यूट्यूबवर अपलोड करण्यात आला आहे.
नितीन गडकरी म्हणाले की हे वाहन खूप शांत आहे, त्याच्या इंजिनला आवाज नाही आणि इंटिरियर एखाद्या आलिशान कारसारखे दिसते. तिचा पिकअप खूप चांगला आहे आणि ड्रायव्हरने पेडल दाबले की एक्झॉस्ट पाईपमधून पाणी येते.
पर्यायी इंधनाच्या जागृतीसाठी पथदर्शी प्रकल्प
एका कार्यक्रमादरम्यान मिराईची ओळख झाली तेव्हा नितीन गडकरी म्हणाले की पायलट प्रोजेक्ट पूर्णपणे पर्यायी इंधनांबद्दल जागरूकता पसरवण्यावर केंद्रित आहे. इंटरनॅशनल सेंटर फॉर ऑटोमोटिव्ह टेक्नॉलॉजी किंवा ICAT सह पायलट प्रोजेक्टचा भाग म्हणून टोयोटा मिराई सादर करण्यात आली आहे. टोयोटा मिराईला सर्वसामान्यांना विकणार की नाही हे अद्याप आम्हाला माहीत नाही. मात्र, यापूर्वीही भारतीय रस्त्यांवर हे दिसून आले आहे, त्यामुळे हा प्रकल्प यशस्वी झाल्यास बस, सार्वजनिक वाहतूक आणि अवजड वाहने हायड्रोजनवर धावू शकतील.
एकदा टॅंक फूल केल्यावर 646 किमी पर्यंत प्रवास
हायड्रोजनने एकदा इंधन टाकी भरल्यानंतर, मिराई सुमारे 646 किमी पर्यंत प्रवास करण्यास सक्षम आहे, जे देशातील कोणत्याही इलेक्ट्रिक कारपेक्षा जास्त आहे. सध्या देशात हायड्रोजन इंधनाची उपलब्धता खूपच कमी असली तरी, ईव्ही प्रमाणे ही वाहने देखील कार्यान्वित होण्यासाठी बराच वेळ लागू शकतो. अहवालांवर विश्वास ठेवला तर, हायड्रोजन रिफिल करण्यासाठी फक्त 3 ते 5 मिनिटे लागतात, जे नियमित पेट्रोल किंवा डिझेल भरण्याइतकेच आहे.
