IPL 2022 : आयपीएलमध्ये आज सुपर सॅटरडे आहे. दिवसाचा पहिला सामना मुंबई इंडियन्स आणि लखनौ सुपर जायंट्स यांच्यात दुपारी ३.३० वाजता सुरु होणार आहे. हा सामना मुंबईच्या ब्रेबॉर्न स्टेडियमवर होणार आहे. पाचवेळा चॅम्पियन मुंबई इंडियन्ससाठी सध्याची स्पर्धा दुःस्वप्न असल्यासारखी आहे. या संघाने पहिले ५ सामने गमावले असून प्लेऑफच्या शर्यतीत टिकून राहण्यासाठी मुंबईकडे आज विजयाशिवाय दुसरा कोणताही पर्याय नाही.
लखनौबद्दल बोलायचे झाले तर, संघाने आतापर्यंत 5 सामने खेळले आहेत आणि 3 सामने जिंकण्यात त्यांना यश आले आहे. दोन सामन्यांत संघाला पराभवाचा सामना करावा लागला. मागील सामन्यात लखनौला राजस्थान रॉयल्सविरुद्धच्या सामन्यात पराभवाला सामोरे जावे लागले होते.
ब्रेबॉर्न स्टेडियमवर मुंबईचा रेकॉर्ड चांगला
मुंबईच्या ब्रेबॉर्न स्टेडियमवर मुंबई इंडियन्सचा रेकॉर्ड खूपच प्रभावी ठरला आहे. संघाने या मैदानावर एकूण 9 आयपीएल सामने खेळले आहेत, त्यात 6 जिंकले आहेत आणि 3 हरले आहेत. मात्र, या मोसमातही रोहित आणि कंपनीने या मैदानावर पहिला सामना खेळला आणि संघाला दिल्ली कॅपिटल्सविरुद्ध पराभवाचा सामना करावा लागला. एकूणच, या मैदानाची आकडेवारी MI च्या बाजूने जाते.
वरिष्ठ खेळाडूंना जबाबदारी घ्यावी लागेल
मुंबईला पुन्हा पराभव टाळायचा असेल, तर संघातील वरिष्ठ खेळाडूंना चांगली कामगिरी करावी लागेल. कर्णधार रोहित शर्मापासून ते कायरॉन पोलार्डपर्यंत कुणीही आतापर्यंत फॉर्ममध्ये दिसले नाहीत. पहिल्या दोन सामन्यात सलग दोन अर्धशतके झळकावणाऱ्या इशान किशननेही नंतर विशेष खेळ दाखवला नाही. हिटमॅनने 5 डावात 108 धावा केल्या आहेत, तर पोलार्डच्या बॅटने केवळ 57 धावा केल्या आहेत.
जसप्रीत बुमराहही गोलंदाजीत लयीत नाही. त्याने 5 सामन्यात 4 विकेट घेतल्या आहेत. बुमराहची इकॉनॉमीही 8 च्या आसपास आहे. त्याच वेळी, टायमल मिल्सने मुंबई इंडियन्ससाठी आपला पहिला हंगाम खेळताना निश्चितपणे 6 विकेट घेतल्या आहेत, परंतु त्याचा इकॉनॉमी रेट देखील 10 च्या आसपास आहे.
