करोना व्हायरसने संपूर्ण जगाला ग्रासले आहे. ३ ते ४ महिन्यांपासून असलेले बंदही आता शिथिल होत आहेत. त्यामुळे रुग्णांची संख्या देखील वाढत आहे. काही खेळाडूंना देखील करोनाची लागण झाली आहे.
बांग्लादेशचा फिरकी गोलंदाज मुशर्रफ हुसेन याचा कोरोना अहवाल पॉसिटीव्ह आढळला आहे. गेल्या वर्षी त्याला ब्रेन ट्यूमर झाल्याचेही निदान झाले होते. त्यामुळे आता तो एकाच वेळी ट्यूमर आणि करोना व्हायरस या दोघांशी लढत आहे. तो सध्या क्वारंटाइन झाला आहे.
करोना आणि ब्रेन ट्यूमर या दोन्हीवर मात करून हुसैनला पुन्हा एकदा मैदानात उतरण्याची इच्छा आहे. याआधी बांगलादेशचे मशर्रफ मुर्तजा, नजमुल इस्लाम आणि नफीस इकबाल यांना जून महिन्यात करोना झाल्याची बातमी आली होती. तर त्याआधी बांगलादेश फुटबॉल संघातील १८ खेळाडूंची करोना चाचणी पॉझिटिव्ह आली होती.
