अग्निपथ योजनेअंतर्गत IAF कडे तीन दिवसांतच 56,960 अर्ज प्राप्त, भारतीय वायुसेनेची माहिती

नवी दिल्ली : भारतीय वायुसेनेला (IAF) अग्निपथ भरती योजनेंतर्गत रविवारपर्यंत 56,960 अर्ज प्राप्त झाले आहेत. अनेक राज्यांमध्ये हिंसक निदर्शने झाल्यानंतर एका आठवड्यात शुक्रवारी नोंदणी प्रक्रिया सुरू झाली, तेव्हापासून तीन दिवसांतच 56,960 अर्ज प्राप्त झाले.

IAF ने रविवारी ट्विटरवर सांगितले कि, “56960! अग्निपथ भरती अर्ज प्रक्रियेला प्रतिसाद म्हणून भविष्यातील अग्निवीरांकडून आतापर्यंत प्राप्त झालेल्या अर्जांची ही एकूण संख्या आहे. https://agnipathvayu.cdac.in वर सुरु असलेली नोंदणी 5 जुलै रोजी बंद होईल.”

56960 !
That’s the total number of applications received till date from future #Agniveers in response to the #Agnipath recruitment application process on https://t.co/kVQxOwkUcz

Registration closes on 05 July 2022.

Details about the process available on the website. pic.twitter.com/fkq4HQ3cbx

— Indian Air Force (@IAF_MCC) June 26, 2022

14 जून रोजी अग्निपथ योजनेचे अनावरण करताना, सरकारने सांगितले होते की 17 ते 21 वर्षे वयोगटातील तरुणांना चार वर्षांच्या कार्यकाळासाठी सामावून घेतले जाईल, तर त्यातील 25 टक्के लोकांना त्यानंतर नियमित सेवेत समाविष्ट केले जाईल. मात्र, देशातील अनेक भागांत या योजनेच्या विरोधात हिंसक निदर्शने झाली.

सरकारने 16 जून रोजी योजनेंतर्गत भरतीसाठी 2022 सालासाठी 21 वरून 23 वर्षे वयोमर्यादा वाढवली होती आणि त्यानंतर त्यांच्या सेवानिवृत्तीनंतर केंद्रीय निमलष्करी दल आणि संरक्षण सार्वजनिक क्षेत्रातील उपक्रमांमध्ये त्यांना प्राधान्य देण्यासारखी अनेक पावले जाहीर केली होती.

अनेक भाजपशासित राज्यांनीही घोषित केले की ‘अग्निवीर’ सैनिक ओळखले जातील, त्यांना राज्य पोलिस दलात समाविष्ट करताना प्राधान्य दिले जाईल. तथापि, सशस्त्र दलाने हे स्पष्ट केले आहे की ज्यांनी नवीन भरती योजनेच्या विरोधात हिंसक निदर्शने आणि जाळपोळ केली होती त्यांना यात सामील केले जाणार नाही.