झारखंड : धनबादचे न्यायाधीश उत्तम आनंद यांच्या हत्येप्रकरणी विशेष सीबीआय न्यायालयाने मोठा निकाल दिला आहे. लखन वर्मा आणि राहुल वर्मा हे दोन्ही आरोपी हत्येचा कट रचणे आणि पुरावे लपविल्याप्रकरणी दोषी आढळले आहेत. दोन्ही आरोपींना कलम 302 आणि 201 अंतर्गत दोषी ठरवण्यात आले आहे. पुढील तारखेला 6 ऑगस्ट रोजी सीबीआयचे विशेष न्यायालय दोन्ही दोषींना शिक्षा सुनावणार आहे. खटल्याच्या सुनावणीदरम्यान सीबीआयच्या गुन्हे शाखेचे विशेष सरकारी वकील अमित जिंदाल यांनी न्यायालयात सांगितले होते की, न्यायाधीशांची हत्या हा अपघात नसून जाणीवपूर्वक केलेले कृत्य आहे.
शवविच्छेदन अहवालापासून ते फॉरेन्सिक अहवाल, सीसीटीव्ही फुटेज, थ्रीडी प्रतिमा आणि व्हिडीओ फुटेज यावरून याची पुष्टी झाली आहे की दोषी लखन वर्मा आणि राहुल वर्मा यांनी मुद्दाम मोबाईल हिसकावण्यासाठी न्यायाधीशांना ऑटोने धडक दिली होती. ऑटोला धडकल्यानंतर न्यायाधीशांच्या डोक्याला गंभीर दुखापत होऊन ते जमिनीवर पडले, त्यामुळे त्यांचा मृत्यू झाला. शवविच्छेदन करणार्या डॉक्टरांनीही न्यायालयासमोरील त्यांच्या जबानीत न्यायाधीशांच्या डोक्याला मोठी जखम झाल्याची पुष्टी केली आहे.
न्यायाधीश उत्तम आनंद मॉर्निंग वॉक करून घरी परतत होते
28 जुलै 2021, दिवस – बुधवार, वेळ – सकाळी 5 वाजता. न्यायाधीश उत्तम आनंद मॉर्निंग वॉक करून आपल्या घरी परतत होते. रस्ता पूर्णपणे सुनसान होता. न्यायाधीश रस्त्याच्या डाव्या बाजूने चालत होते. त्याचवेळी मागून एक ऑटोरिक्षा आली. ऑटोरिक्षा रस्त्याच्या मधोमध सरळ पुढे जात होती, मात्र त्यानंतर अचानक रिक्षा न्यायाधीश उत्तम आनंद यांच्या दिशेने वळली आणि त्यांना जोरदार धडक दिली. ही संपूर्ण घटना सीसीटीव्हीमध्ये कैद झाली.
