पंजाब : अभिनेता दीप सिद्धू याचा मंगळवारी रात्री अपघातात मृत्यू झाला. अपघातानंतर दीप सिद्धूचा मृतदेह सोनीपतच्या सरकारी रुग्णालयात नेण्यात आला होता. सोनीपत सिव्हिल हॉस्पिटलमध्ये दीप सिद्धूच्या मृतदेहाचे पोस्टमॉर्टम पूर्ण झाले आहे. दीप सिद्धू याचा मृतदेह कुटुंबीयांच्या ताब्यात देण्यात आला असून, लुधियाना येथे त्याच्यावर अंतिम संस्कार करण्यात येणार आहेत.
सोनीपाल पोलिसांनी दीप सिद्धूचे पोस्टमार्टम पूर्ण झाल्याची माहिती दिली. तीन डॉक्टरांच्या पथकाने दोन डीएसपींच्या उपस्थितीत शवविच्छेदन केले. पोलिसांनी मृतदेह नातेवाईकांच्या ताब्यात दिला. दीप सिद्धू याचा मृतदेह घेण्यासाठी त्याचे समर्थक मोठ्या संख्येने सोनीपत येथील सरकारी रुग्णालयात पोहोचले होते. ज्या रुग्णवाहिकेतून दीपचा मृतदेह नेण्यात आला, त्या रुग्णवाहिकेवर समर्थक आणि नातेवाईकांनी पुष्पवृष्टी केली. एवढेच नाही तर नातेवाईक आणि समर्थकांनी दीप सिद्धू जिंदाबादच्या घोषणाही दिल्या. पंजाबी अभिनेता, गायक आणि सामाजिक कार्यकर्ता दीप सिद्धू याचा मृतदेह पंजाबमध्ये नेण्यात येत असल्याची माहिती त्याच्या कुटुंबीयांनी दिली आहे. त्याच्या पार्थिवावर लुधियानामध्येच अंत्यसंस्कार होणार आहेत.
दीप सिद्धू तीन कृषी कायद्यांविरोधातील शेतकरी आंदोलनातील एक प्रसिद्ध चेहरा होता. दीप सिद्धूला 26 जानेवारी 2021 रोजी लाल किल्ल्यावरील हिंसाचारातही आरोपी करण्यात आले होते. दीप सिद्धू जामिनावर बाहेर होता आणि मंगळवारी दिल्लीहून पंजाबला परतत होता. सोनीपाल येथील कुंडली सीमेवर त्याची स्कॉर्पिओ ट्रकला धडकली. या अपघातात दीप सिद्धूचा मृत्यू झाला.
