अमरनाथ : अमरनाथ गुहेजवळ झालेल्या ढगफुटीत आतापर्यंत 16 जणांचा मृत्यू झाल्याचे स्पष्ट झाले आहे. अद्याप 35 ते 45 भाविक बेपत्ता आहेत. त्यामुळे मृतांचा आकडा वाढण्याची भीती व्यक्त केली जात आहे. शुक्रवारी संध्याकाळी 5.30 च्या सुमारास घडलेल्या या घटनेवेळी गुहेजळ तब्बल 10 ते 15 हजार भाविक उपस्थित होते. या ठिकाणी अडकलेल्या भाविकांना सध्या पंचतरणीला हलवण्यात आले आहे. हवाई दलातर्फे या ठिकाणी युद्ध पातळीवर मदत व बचावकार्य सुरु आहे.
अमरनाथ गुहेपासून एक ते दोन किलोमीटरच्या परिसरात ढगफुटी झाली होती. डोंगरावरून आलेल्या पाण्याच्या वेगवान प्रवाहाने भाविकांसाठी उभारलेले सुमारे 25 तंबू आणि 2 ते 3 लंगर वाहून गेले. पावसामुळे संपूर्ण परिसर जलमय झाला आहे. अनेक यात्रेकरू बेपत्ता आहेत.
लष्करासह अनेक यंत्रणा बचावकार्यात सहभागी
घटनेनंतर लगेचच जम्मू-काश्मीर पोलिसांच्या टीमसह आर्मी, आयटीबीपी, सीआरपीएफ, बीएसएफ, एनडीआरएफ आणि एसडीआरएफने बचावकार्य सुरू केले. लोकांना सुरक्षितपणे बाहेर काढले जात असून त्यांना छावण्यांमध्ये हलवण्यात येत आहे. जखमींना विमानाने रुग्णालयात दाखल करण्यात आले आहे.
हेल्पलाइन नंबर :
- 0194 2313149
- 0194 2496240
- 9596779039
- 9797796217
- 01936243233
- 01936243018
