नागपूर : भंडारा महिला अत्याचार प्रकरणी दोषींवर कडक करावी, असे निर्देश विधानपरिषदेच्या उपसभापती डॉ. नीलम गोऱ्हे यांनी दिले. उपसभापती डॉ. गोऱ्हे यांनी या घटनेची दखल घेऊन स्थानिक पोलीस प्रशासनाशी संपर्क साधला. तत्पूर्वी डॉ. गोऱ्हे यांनी पीडित महिलेच्या कुटुंबियांना प्रकृतीची विचारपूस करून धीर दिला, त्यांना न्याय मिळण्याकरीता कायदेशीर मदत करणार असल्याची ग्वाही देखील दिली.
नागपूर वैद्यकीय महाविद्यालयाचे अधिष्ठाता डॉ. सुधीर गुप्ता यांच्याशी दूरध्वनीद्वारे संपर्क साधून पीडित महिलेच्या प्रकृतीची विचारणा केली. तिच्या संपूर्ण उपचारासाठी शासकीय स्तरावर सर्व काळजी घेतली जाईल अशी ग्वाही दिली. या दरम्यान भंडारा जिल्हा पोलीस अधीक्षक (का.) अनिकेत भारती यांनीही या घटनेचा अधिक गतीने तपास करून योग्य ती कार्यवाही करणार असल्याची माहिती दिली.
या घटनेबाबत पीडितेला न्याय मिळवून देण्यासाठी डॉ. नीलम गोऱ्हे यांनी या घटनेच्या सर्व संबंधित आरोपीस लवकरात लवकर जेरबंद करावे, घटनेचा तपास जलदगतीने करावा, घटनेतील आरोपीस मदत करणाऱ्या त्यांच्या साथीदारांचा शोध घेऊन त्यांना त्वरित अटक करण्यात यावी व कडक कलमे लावण्यात यावीत, पीडित महिलेचे समुपदेशन करावे तसेच मनोधैर्य योजनेतून पुनर्वसन करण्यासाठी प्रयत्न करावेत, अशा सूचना नागपूर परिक्षेत्राचे विशेष पोलीस महानिरिक्षक छेरिंग दोर्जे यांना उपसभापती डॉ. गोऱ्हे यांनी दूरध्वनीद्वारे दिल्या.
काय आहे प्रकरण?
पीडित तरुणी गेल्या अनेक महिन्यांपासून बहिणीसोबत माहेरी राहत होती. दोघींमध्ये झालेल्या क्षुल्लक कारणावरून पीडिता रागाच्या भरात घराबाहेर पडली. यानंतर आरोपीने तिला मदतीचे आश्वासन देत भयंकर अत्याचार केले. त्याने तिला भंडारा जिल्ह्यातील कन्हाळमोह जंगलात नेत सामूहिक बलात्कार केले. यामुळे पीडितेला गंभीर इजा झाल्या असून तिचा मृत्यूशी संघर्ष सुरू आहे. आरोपीने गाडी एका ढाब्याजवळील दुचाकी दुरुस्त करणाऱ्या दुकानात नेली. त्यानंतर दुचाकीस्वाराने तिला पुन्हा जंगलात नेले अन् दोघांनी मिळून तिच्यावर अत्याचार केले. त्यानंतर निर्वस्त्र अवस्थेत तिला फेकून देत पळ काढला.
दरम्यान, काही जणांनी पीडितेला पाहिल्यानंतर उपचारासाठी मेडिकल कॉलेज, नागपूर येथे दाखल केले. रक्तस्राव थांबत नसल्याने तिच्यावर कोलोस्टॉमी शस्त्रक्रिया करण्यात आली आहे. आवश्यक नमुने फॉरेन्सिक प्रयोगशाळेत पाठविण्यात आले असून कारधा पोलिस अधिक तपास करत आहेत.
