मुंबई : पत्रा चाळ घोटाळा प्रकरणी शिवसेना खासदार संजय राऊत यांच्या पत्नी वर्षा आज ईडीसमोर हजर होणार आहेत. ईडीच्या म्हणण्यानुसार वर्षा राऊत यांच्या खात्यातील व्यवहारानंतर हे समन्स जारी करण्यात आले होते. ईडीचे अधिकारी संजय राऊत आणि वर्षा राऊत यांना समोरासमोर बसवून दोघांची चौकशी करू शकतात.
गुरुवारी न्यायालयात न्यायाधीश देशपांडे यांनी राऊत यांना काही अडचण आहे का, असे विचारले असता राऊत म्हणाले, मला ज्या खोलीत ठेवण्यात आले आहे तेथे खिडकी व वायुवीजन नाही. त्यावर न्यायालयाने ईडीच्या वकिलांकडून स्पष्टीकरण मागितले. ईडीच्या वकिलांनी सांगितले की, राऊत यांना एसी (वातानुकूलित) खोलीत ठेवण्यात आले आहे. त्यामुळे तिथे खिडकी नाही. त्यानंतर राऊत यांनी कबूल केले की खोलीत एसीची व्यवस्था आहे, परंतु प्रकृती अस्वास्थ्यामुळे ते वापरू शकत नाहीत.
राऊत यांच्या संपर्कांवर ईडीची नजर
अंमलबजावणी संचालनालय पत्रा चाळ घोटाळा आणि मनी लाँड्रिंग प्रकरणात राऊत यांना अटक केल्यानंतर त्यांच्या संपर्कांचा शोध घेण्याचा प्रयत्न करत आहे. विशेषत: प्रवीण राऊत, सुजित पाटकर आणि राऊत यांच्या पत्नी वर्षा राऊत यांचे एकमेकांशी काय संबंध आहेत, याचा तपास सुरू आहे. ईडीचे अधिकारी संजय राऊत आणि त्यांची पत्नी वर्षा राऊत यांच्या बँक खात्यात पैसे कसे ट्रान्सफर झाले हे शोधण्याचा प्रयत्न करत आहेत. प्रवीण राऊत यांनी संजय राऊत आणि त्यांच्या नातेवाईकांच्या खात्यात १.६ कोटी रुपये ट्रान्सफर केल्याचा आरोप आहे.
