पुणे : खडकवासला धरणातून मुठा नदीपात्रात होणारा पाण्याचा विसर्ग मंगळवारी दुपारी वाढवण्यात आला असल्याची माहिती पाटबंधारे विभागाने दिली आहे.
धरणातून ११,८७८ क्युसेक इतका विसर्ग सुरू होता. मात्र, दुपारी २ वाजेपासून हा विसर्ग वाढवून १५,४४२ क्युसेक इतका करण्यात आला आहे. पावसाळा आणि धरणातील पाण्याची आवक लक्षात घेऊन विसर्गाची मात्रा पुढे आणखी वाढवली किंवा कमी केली जाऊ शकते, असा इशारा अधिकाऱ्यांनी दिला आहे.
स्वारगेट येथील मुठा कालवा सिंचन उपविभागाचे उपविभागीय अभियंता मोहन भदाणे यांनी यासंदर्भात सूचना जारी केल्या आहेत. नदीकाठच्या नागरिकांना सतर्क राहण्याचे तसेच विसर्ग पातळीत होणाऱ्या चढ-उतारांमुळे आवश्यक ती खबरदारी घेण्याचे आवाहन करण्यात आले आहे.
