सिम्बायोसिस स्किल्स अँड प्रोफेशनल युनिव्हर्सिटीच्या पहिल्या पदवी प्रदान समारंभात मराठी भाषा मंत्री सुभाष देसाई उपस्थित होते. या समारंभात निम्म्यापेक्षा अधिक व्यक्तींना मराठी भाषा समजत होती, मात्र तरीदेखील मराठी भाषा मंत्री सुभाष देसाई यांनी येथे इंग्रजीत भाषण केले. मराठी भाषा मंत्री असूनही भाषण करण्यासाठी मराठी भाषेचा वापर न करता इंग्रजीत भाषण केल्यामुळे चर्चेला उधाण आलं आहे.
एकीकडे राज्यपाल, मुख्यमंत्री जाहीर कार्यक्रमात उपस्थितांना मराठी बोलण्याचा आग्रह धरतात, तर दुसरीकडे मराठी भाषा विभागाचे मंत्री इंग्रजीत भाषण करतात, अशी चर्चा सुरु झाली आहे. देसाई यांनी भाषणाला सुरुवात मराठीतून केली. मात्र, नंतर त्यांनी इंग्रजीतून भाषण केलं. मराठी भाषा विभागाचे मंत्रीच मराठीत भाषण करीत नाही, तर मराठी भाषेचा प्रचार व प्रसार कसा होईल, असा प्रश्न त्यामुळे उपस्थित झाला आहे.
