पुणे : पुणे शहरात बेकायदेशीर गुटखा आणि तंबाखू उत्पादनांच्या वितरणाविरुद्ध एक महत्त्वपूर्ण कारवाई करण्यात आली आहे. पोलिस व अन्न आणि औषध प्रशासन (एफडीए) अधिकाऱ्यांनी संयुक्तपणे ६४ लाख रुपयांचा गुटखा जप्त केला आहे. याप्रकरणी एक व्यक्तीला अटक करण्यात आली असून, त्याचे सहकारी गुप्त पद्धतीने गुटखा विक्रीसाठी कार्यरत होते. पुण्यात गुटखा विक्रीच्या वाढत्या तक्रारींच्या अनुषंगाने ही कारवाई करण्यात आली. गुटखा आणि संबंधित उत्पादनांवर राज्य सरकारने आधीच बंदी घातली आहे, परंतु तरीदेखील अनेक गुप्त वितरण नेटवर्क बेकायदेशीरपणे कार्यरत असल्याचे उघडकीस आले आहे.
कोंढवा पोलिस आणि एफडीए अधिकाऱ्यांच्या संयुक्त पथकाने कोंढवा येथील उंड्रीजवळ असलेल्या एका गोदामावर छापा टाकला. त्याठिकाणी गुटख्याचा मोठा साठा सापडला, ज्याची किंमत ६४ लाख ४४ हजार रुपये होती. दरम्यान, छापेमारी करत असताना गोदामातील तीन ते चार आरोपींनी घटनास्थळावरून पळ काढला, परंतु त्यापैकी एक आरोपी, संपतराज चौहान ( वय ३८) याला अटक करण्यात पोलिसांना यश मिळाले आहे. आरोपी चौहान हा कोंढवा येथील रहिवासी असून, त्याच्या सहकाऱ्यांविरुद्धही गुन्हे दाखल करण्यात आले आहेत. या कारवाईत १२ लाख रुपयांच्या किमतीची चार वाहने देखील जप्त करण्यात आली, जी गुटखा वाहतूक करण्यासाठी वापरली जात होती. एकूण जप्त केलेल्या मालमत्तेची किंमत ७६ लाख रुपयांहून अधिक आहे.
एफडीए अधिकारी विजयकुमार उनवणे यांच्या तक्रारीनुसार, कोंढवा पोलिस ठाण्यात कारवाई सुरू करण्यात आली होती. या कारवाईत पोलिस उपायुक्त डॉ. राजकुमार शिंदे यांच्या मार्गदर्शनाखाली झोन ५ पोलिस अधिकाऱ्यांनी महत्त्वाची भूमिका बजावली. तर कोंढवा पोलिस ठाण्याचे वरिष्ठ निरीक्षक मानसिंग पाटील स्थानिक पोलिस पथकाचे नेतृत्व करत होते.
गुटखा, पान मसाला, सुगंधित तंबाखू आणि संबंधित उत्पादनांवर राज्यव्यापी बंदी आहे, आणि या बंदीच्या अंमलबजावणीसाठी सरकारने कठोर पावले उचलली आहेत. ह्या छाप्याद्वारे ही कारवाई तशाच प्रकारे सुरू राहील, असे संकेत पोलिसांनी दिले आहेत. याव्यतिरिक्त, पोलीस व एफडीए अधिकाऱ्यांनी ज्या प्रमाणात काम करत गुटखा वितरण करणाऱ्यांचे जाळे उघडकीस आणले आहे, त्यावरून यापुढे गुटखा व तंबाखू संबंधित उत्पादनांची तस्करी आणि वितरण थांबवण्याचे ठरवले आहे.
