पुणे : पुणे-मुंबई एक्स्प्रेस वेवर आज सकाळी भीषण अपघात झाला असून वाहतूक विस्कळीत झाली आहे. एक्स्प्रेस वेवर भोर घाट पोलीस चौकीजवळ काचा वाहून नेणाऱ्या ट्रकची दुसऱ्या ट्रकला धडक बसल्याने हा अपघात झाला. सकाळी आठच्या सुमारास हा अपघात झाल्याची माहिती मिळाली आहे.
या अपघातात तीन जण गंभीर जखमी झाले असून त्यांना उपचारासाठी रुग्णालयात दाखल करण्यात आले आहे. एक्स्प्रेस वेवर वाहतूक संथ गतीने सुरू असून महामार्ग पोलिस वाहतूक सामान्य करण्याचा प्रयत्न करत आहेत.
अपघातानंतर काचा वाहून नेणारा ट्रक पलटी झाल्यामुळे काचा मुंबईच्या दिशेने संपूर्ण रस्त्यावर पसरल्या, त्यामुळे पुण्याहून मुंबईच्या दिशेने जाणार्या वाहतुकीवर परिणाम झाला. त्यामुळे, जुन्या पुणे-मुंबई महामार्गावरून वाहने वळवण्यात आली. अपघातानंतर लगेचच ट्रक रस्त्यावरून बाजूला काढण्यासाठी आयआरबी, स्थानिक पोलिसांसह बचाव पथक घटनास्थळी दाखल झाले. या घटनेनंतर मुंबईकडे जाणारी अवजड वाहनांची वाहतूक ठप्प झाली होती.