पावसाळ्यात त्वचेला खाज आणि इन्फेक्शनची भीती? जाणून घ्या कारणे, काळजी आणि उपाय…

पुणे : पावसाळ्याच्या आगमनानंतर वातावरणात दमटपणा वाढतो. या काळात त्वचेसंबंधी अनेक समस्या निर्माण होतात. खाज, बुरशीजन्य संसर्ग (फंगल इन्फेक्शन), घामोळे आणि ॲलर्जीमुळे नागरिकांना त्रास सहन करावा लागतो. योग्य काळजी घेतली नाही, तर या समस्यांचे गंभीर संक्रमणात रुपांतर होऊ शकते. त्वचारोग तज्ज्ञांनी नागरिकांना स्वच्छता राखण्याचे आणि योग्य काळजी घेण्याचे आवाहन केले आहे, अन्यथा ही लक्षणे गंभीर संसर्गामध्ये रूपांतरित होऊ शकतात.

पावसाळ्यात वातावरणातील आर्द्रता वाढते. त्यामुळे त्वचेवर घाम आणि ओलावा सतत टिकतो. हा ओलावा बुरशी आणि जीवाणू वाढण्यास पोषक असतो. त्वचेला हवेशीर वातावरण न मिळाल्यास खाज सुटणे आणि लाल चट्टे पडणे यांसारख्या समस्या वाढतात.

पावसाळ्यात त्वचेसंबंधी सामान्य समस्या

टिनिया (Ringworm):
त्वचेवर गोल लालसर डाग तयार होतात. खूप खाज येते. हा संसर्ग संपर्कातून सहज पसरतो.

घामोळे:
घाम आणि दमटपणामुळे लहान पुरळ येतात. ओलसर कपडे याला कारणीभूत असतात.

अथलीट्स फूट:
पायाच्या बोटांमध्ये जंतू संसर्ग वाढतो. खवले पडणे, खाज, वास येणे ही लक्षणे दिसतात.

बॅक्टेरियल इन्फेक्शन (Impetigo):
त्वचेवर पुळ्या येऊन पिवळसर पू साठतो. विशेषत: मुलांमध्ये दिसते.

सेबोरिक डर्माटायटिस:
डोक्यावर किंवा चेहऱ्यावर खवले आणि खाज निर्माण होते.

पावसाळ्यात घ्यावयाची काळजी

• दररोज स्वच्छ अंघोळ करा आणि त्वचा कोरडी ठेवा.
• ओलसर कपडे व बूट लगेच बदला.
• कॉटनचे सैल कपडे घालून त्वचेला हवा लागू द्या.
• पाय आणि बोटांची विशेष स्वच्छता ठेवा.
• गरज असल्यास डॉक्टरांच्या सल्ल्याने अँटिफंगल पावडर वापरा.
• टॉवेल, कपडे, सॅंडल इतरांशी शेअर करू नका.
• नखं नेहमी कापून स्वच्छ ठेवा.
• पावसात भिजल्यानंतर त्वचा त्वरित कोरडी करा.

घरगुती उपाय (सौम्य त्रासासाठीच)

• एलोवेरा जेल: त्वचेला थंडावा देतो, खाज कमी करतो.
• नारळ तेल किंवा कोकम तेल: त्वचा कोरडी ठेवण्यासाठी उपयुक्त.

(गंभीर संसर्गात घरगुती उपाय न करता त्वचारोग तज्ज्ञांचा सल्ला घेणे आवश्यक.)

कधी सावध व्हावे?
तज्ज्ञांच्या मते, या लक्षणांकडे दुर्लक्ष करू नये:

• त्वचेला तीव्र खाज किंवा जळजळ होणे
• लालसर किंवा पांढरे रिंगसदृश डाग
• त्वचेला दुर्गंध येणे
• जखमांमधून पाणी किंवा पू पडणे

तज्ज्ञांचे आवाहन
पावसाळ्यात स्वच्छता व त्वचा कोरडी ठेवणे अत्यंत गरजेचे आहे. कोणतीही लक्षणे वाढल्यास त्वरित उपचार सुरू करा.

पावसाळ्यात स्वच्छता, योग्य आहार आणि शरीराला वायुवीजन मिळेल याची काळजी घेतल्यास या समस्या सहज टाळता येतात.