दक्षिण आफ्रिका : दक्षिण आफ्रिकेच्या डर्बन येथील कोर्टाने महात्मा गांधींची पणती आशिष लता रामगोबिन यांना सात वर्षांच्या तुरूंगवासाची शिक्षा सुनावली आहे. कोर्टाने त्यांना 6.2 मिलियन रॅन्ड (आफ्रिकन चलन) म्हणजेच सुमारे ३.22 कोटी रुपयांची फसवणूक केल्याप्रकरणी दोषी ठरवले आहे.
वृत्तानुसार, 56 वर्षीय आशिष लता रामगोबिन यांच्यावर आरोप आहे की त्यांनी उद्योगपती एस.आर. महाराजांची फसवणूक केली. एसआर महाराजांनी त्यांना भारतात उपस्थित असलेल्या वस्तूंसाठी (कंसाइनमेंट) आयात आणि सीमा शुल्क म्हणून 6.२ दशलक्ष रॅन्ड ऍडव्हान्समध्ये दिले होते. आशिष लता रामगोबिन यांनी त्या नफ्यामध्ये हिस्सा देण्याविषयी सांगितले होते.
आशिष लता रामगोबिन कोण आहेत?
आशिष लता रामगोबिन या सुप्रसिद्ध कार्यकर्त्या इला गांधी आणि दिवंगत मेवा रामगोविंद यांची मुलगी आहे. त्यांनी दक्षिण आफ्रिकेत महात्मा गांधी यांनी आपल्या कारकिर्दीत स्थापन केलेल्या फिनिक्स सेटलमेंटला पुनरुज्जीवित करण्यात महत्त्वपूर्ण भूमिका बजावली आहे.
काय आहे प्रकरण?
2015 मध्ये लता रामगोबिन यांच्याविरूद्ध खटल्याच्या सुनावणीदरम्यान, राष्ट्रीय फिर्यादी प्राधिकरणाचे (NPA) ब्रिगेडिअर हंगवानी मुलुदजी यांनी सांगितले होते की आशिष लता रामगोबिन यांनी संभाव्य गुंतवणूकदारांना बनावट पावत्या आणि कागदपत्रे दिली होती. ज्याद्वारे ती गुंतवणूकदारांना सांगत होती की तागाचे तीन कंटेनर भारतातून पाठवले जात आहेत.
एनपीएच्या प्रवक्त्या नताशा कारा यांनी सोमवारी सांगितले की, “लता रामगोबिन यांनी सांगितले होते की, मला आयात खर्च व सीमा शुल्क भरण्यासाठी आर्थिक अडचणी येत आहेत, बंदरातील सामान खाली करण्यासाठी त्यांना पैशांची गरज होती.” यानंतर लता रामगोबिन यांनी महाराजांना सांगितले की त्यांना 6.2 मिलियन रॅन्डची गरज आहे. त्यासाठी त्यांनी संबंधित कागदपत्रे देखील दाखवली. त्यामध्ये वस्तूंच्या खरेदीशी संबंधित कागदपत्रे होती. एका महिन्यानंतर लता रामगोबिन यांनी एसआर महाराज यांना पुन्हा आणखी एक कागदपत्र पाठविले, जे नेटकेअर चालान होते, त्यामध्ये असे दिसून आले की माल वितरित झाला आहे, परंतु, पैसे मात्र दिले गेले नाहीत.
