सिनेसृष्टीतील ज्येष्ठ गायिका आशा भोसले यांचा मुलगा आनंद भोसले यांच्याविषयी मोठी बातमी समोर येत आहे. मिळालेल्या माहितीनुसार, आनंद भोसले यांची प्रकृती अचानक बिघडल्याने त्यांना दुबईतील रुग्णालयात दाखल करण्यात आले आहे. दरम्यान, गायिका आशा भोसले आपल्या मुलासोबत दुबईत आहेत, आनंद पूर्णपणे बरा होईपर्यंत त्या तिथेच राहणार आहेत. आनंद यांना गेल्या काही दिवसांपासून आरोग्याच्या समस्या भेडसावत होत्या, चक्कर आल्याने ते जमिनीवर पडले, त्यानंतर त्यांना तातडीने रुग्णालयात नेण्यात आले.
चक्कर येऊन जमिनीवर पडल्याने आनंद यांना किरकोळ दुखापत झाली होती, मात्र यामुळे मंगेशकर आणि भोसले कुटुंबाला मोठा धक्का बसला आहे. दुसरीकडे, आनंद भोसले यांच्या प्रकृतीबाबत बॉलिवूडमधून चिंता व्यक्त केली जात आहे. मीडिया रिपोर्ट्सनुसार, दिलासा देणारी बातमी म्हणजे आता आनंद यांना आयसीयू वॉर्डमधून जनरल वॉर्डमध्ये हलवण्यात आलं आहे. आशा भोसले यांचा दुसरा मुलगा आनंद याने चित्रपट दिग्दर्शन आणि व्यवसायाचे शिक्षण घेतले आहे.
आशा भोसले यांचा मोठा मुलगा हेमंत याचे २०१५ मध्ये कर्करोगाने निधन झाले होते. आशा भोसले यांची मुलगी वर्षा भोसले यांनी २०१२ मध्ये आत्महत्या केली होती. आशा यांची सर्व मुले त्यांचे पहिले पती गणपतराव भोसले यांची होती, त्यांचे लग्न फार काळ टिकले नाही. लग्नाच्या 11 वर्षानंतर आशा आणि गणपतराव यांनी एकमेकांपासून वेगळे होण्याचा निर्णय घेतला होता. नंतर आशा भोसले यांनी आरडी बर्मन यांच्याशी विवाह केला.
