नवी दिल्ली : टाटा समूहाचे माजी अध्यक्ष सायरस मिस्त्री यांच्या निधनानंतर केंद्र सरकारने मोठा निर्णय घेतला आहे. आतापासून कारमधील प्रत्येकाला सीट बेल्ट लावणे बंधनकारक असेल. तुम्ही समोरच्या सीटवर बसलात किंवा मागच्या बाजूला, प्रत्येकाला सीट बेल्ट घालणे बंधनकारक करण्यात आले आहे. केंद्रीय मंत्री नितीन गडकरी यांनी यासंदर्भात माहिती दिली आहे. मोठी गोष्ट म्हणजे चालकाच्या मागच्या सीटवर बसलेल्या प्रवाशांनी सीट बेल्ट न लावल्यास चालानही कापले जाणार आहे. मागे बेल्ट लावण्यासाठी क्लिपची व्यवस्था केली जाईल.
मागच्या सीटवर बसलेल्या प्रवाशांनी सीट बेल्ट न लावल्यास अलार्म वाजत राहतो, असेही सांगितले जात आहे. यासंबंधीचा आदेश येत्या १५ दिवसांत जारी केला जाणार आहे. टाटा सन्सचे माजी अध्यक्ष सायरस मिस्त्री यांचा मुंबई-अहमदाबाद महामार्गावर कार अपघातात मृत्यू झाला. त्यांची कार मुंबईजवळ दुभाजकाला धडकली आणि हा अपघात झाला. प्राथमिक तपासात, पोलिसांच्या लक्षात आले की, अपघाताचे कारण ओव्हरस्पीड आणि चुकीच्या बाजूने ओव्हरटेकिंग होते. मागे बसलेल्या सायरस मिस्त्री यांनी सीट बेल्ट लावला नसल्याचेही बोलले जात आहे.
आता या सर्व बाबी लक्षात घेऊन केंद्र सरकारने हा मोठा निर्णय घेतला आहे. पूर्वी ड्रायव्हिंग सीटवर बसलेल्या व्यक्तीने सीट बेल्ट लावायचा, असा नियम होता. पण आता मागे बसलेल्या व्यक्तीलाही तो नियम पाळावा लागणार आहे. रस्ते अपघात कमी व्हावेत यासाठी अधिक सुरक्षिततेवर भर दिला जात आहे. लोकांनी हा नियम विसरू नये, म्हणून वाहनातील अलार्म यंत्रणा कार्यान्वित करण्याचेही बोलले जात आहे. कारमध्ये बसलेल्या कोणीही सीट बेल्ट लावला नाही तर अलार्म वाजत राहील, अशा परिस्थितीत लोकांना नियम पाळणे भाग पडेल.
