Sonali Phogat’s Autopsy Report : भाजप नेत्या सोनाली फोगटच्या पोस्टमॉर्टम रिपोर्टमध्ये मोठा खुलासा झाला आहे. सोनालीच्या अंगावर अनेक जखमांच्या खुणा आढळून आल्याचे सांगण्यात येत आहे. रिपोर्टनुसार ही दुखापत कुठल्यातरी जड किंवा घन वस्तूमुळे झाली असावी.
यापूर्वी गोवा पोलिसांनी दोन जणांविरुद्ध खुनाचा गुन्हा दाखल केला आहे. सोनालीच्या कुटुंबीयांनी तिचा पीए आणि त्याच्या साथीदारावर बलात्कार, हत्येचा आरोप केला होता. यासोबतच गोवा पोलिस कारवाई करत नसल्याचा आरोपही त्यांनी केला होता. सोनाली फोगट मृत्यूप्रकरणात भारतीय दंड संहितेचे कलम ३०२ (हत्या) जोडण्यात आले आहे, असे आयजीपी ओएस बिश्नोई यांनी सांगितले. या प्रकरणात सुधीर सांगवान आणि सुखविंदर वासी यांना आरोपी करण्यात आल्याचे त्यांनी सांगितले. 22 ऑगस्टला सांगवान आणि वासी तिच्यासोबत होते.
सोनाली फोगटचा भाऊ रिंकू ढाका याने बुधवारी अंजुना पोलिस ठाण्यात दोघांविरोधात तक्रार दाखल केली होती. आदल्या दिवशी गोवा मेडिकल कॉलेज आणि हॉस्पिटलमध्ये फोगटचे पोस्टमॉर्टम करण्यात आले.
