LPG Price : एप्रिल महिन्याच्या पहिल्याच दिवशी महागाईचा जोरदार झटका बसला आहे. व्यावसायिक सिलिंडर पुन्हा एकदा महाग झाला आहे. १९ किलोच्या सिलिंडरमध्ये २५० रुपयांची वाढ केली आहे. त्यामुळे व्यावसायिकांना दरवाढीचा झटका बसला आहे. घरगुती वापराच्या सिलिंडरच्या किमतीत मात्र कोणताही बदल झाला नाही.
१० दिवसांपूर्वीच घरगुती गॅस सिलिंडरच्या दरात मोठी वाढ करण्यात आली होती. विनाअनुदानित घरगुती एलपीजी सिलिंडरच्या किंमतीत ५० रुपयांची वाढ करण्यात आली होती. २२ मार्च रोजी व्यावसायिक सिलिंडर स्वस्त झाला होता. मात्र आज नवीन आर्थिक वर्षाच्या पहिल्या दिवशीच व्यावसायिक सिलिंडरच्या दरात मोठी दरवाढ करण्यात आली आहे. आजच्या दरवाढीनंतर १९ किलो एलपीजी सिलिंडरसाठी दिल्लीत आजपासून २२५३ रुपये मोजावे लागणार आहेत. तर, मुंबईत २२०५ रुपयांना १९ किलो एलपीजी सिलिंडर मिळणार आहे.
