गुरुग्राम : हरियाणाच्या गुरुग्राममध्ये भीषण अपघात झाला आहे. गुरुग्राम-द्वारका द्रुतगती मार्गावरील निर्माणाधीन उड्डाणपूल कोसळला आहे. या अपघातात आतापर्यंत दोन कामगार जखमी झाल्याची माहिती आहे. मदत व बचावकार्य सुरू आहे.
द्वारका एक्स्प्रेस वेवरील दौलताबाद गावाजवळ ही घटना घडली. मिळालेल्या माहितीनुसार, गुरुग्राममध्ये निर्माणाधीन उड्डाणपुलाचा स्लॅब कोसळला आहे. द्वारका एक्स्प्रेस वेवर उभारण्यात येत असलेल्या एलिव्हेटेड उड्डाणपुलाचा स्लॅब कोसळला, त्यात दोन लोक जखमी असल्याचे सांगण्यात आले. जखमींना खासगी रुग्णालयात दाखल करण्यात आले आहे. सकाळी 6 ते 7 वाजेदरम्यान ही घटना घडल्याची माहिती मिळत आहे. या अपघातामुळे मोठा आवाज झाला. तो आवाज ऐकल्यानंतर स्थानिकांनी घटनास्थळी धाव घेतली. स्थानिक नागरिकांनीच घटनेची माहिती प्रशासनाला दिली.