राजस्थान : राजस्थानमधील दौसा जिल्ह्यातील लालसोट पोलीस स्टेशन परिसरात गुरु-शिष्याच्या नात्याला काळीमा फासणारी घटना घडली आहे. येथे एका शिक्षकाने अल्पवयीन विद्यार्थिनीला धमकी दिली आणि तिच्यासमोर अश्लील अट ठेवत म्हणाला की, तू मला खुश कर, मग मी तुला चांगले गुण देईन. जर माझे ऐकले नाही तर मी तुला नापास करेन. यानंतर मुलीने धाडस करून हा प्रकार घरच्यांना सांगितला, त्यानंतर मुलीच्या कुटुंबीयांनी याप्रकरणी पोलिसांत तक्रार दाखल केली.
कुटुंबीयांनी तक्रार दाखल केल्यानंतर पोलिसांनी पॉक्सो कायद्यांतर्गत या शिक्षकाविरुद्ध गुन्हा नोंदवून घेतला. त्यानंतर आरोपी शिक्षकाला त्याच्या घरातून अटक करून पोलीस ठाण्यात आणण्यात आले. दरम्यान, आरोपी शिक्षक आपले तोंड लपवत होता. विद्यार्थिनीने पोलिसांत दिलेल्या तक्रारीत म्हटले आहे की, 16 फेब्रुवारी रोजी सकाळी 11.15 च्या सुमारास ती शाळेत गेली होती. यादरम्यान शाळेतील इंग्रजी शिक्षक ओमप्रकाश (३०) यांनी मला त्यांच्याकडे बोलावले आणि हाताला धरून जवळच्या रिकाम्या खोलीत नेले. यादरम्यान शिक्षकाने माझे दोन्ही हात घट्ट पकडले आणि मुरगळत राहिला आणि म्हणाला की तू मला खुश करशील तर मी तुला पूर्ण मार्क देईन.
विद्यार्थिनीने सांगितले की, ती इयत्ता पहिलीपासून या शाळेत शिकत आहे. इंग्रजी शिकवणारा, विनयभंग करणारा ओम प्रकाश वर्गातही तिला खूप त्रास देतो. या प्रकरणाबाबत पोलीस अधिकाऱ्यांनी सांगितले की, ओमप्रकाश हा सुमारे ४ वर्षांपासून खासगी शाळेत इंग्रजीचा शिक्षक असून त्यांनी पीडितेचा जबाब नोंदवला आहे. याप्रकरणी पुढील तपास पोलीस करत आहेत.
