पंढरपूर : तालमीत कुस्तीचा सराव करत असताना २३ वर्षाच्या पैलवानाचा मृत्यू झाल्याची धक्कादायक घटना घडली आहे. पंढरपूरच्या वाखरी येथील मारूती सुरवसे हा तरुण कोल्हापुरातील एका तालमीत सराव करत होता, त्यावेळी ही घटना घडली. त्याचा मृत्यू हृदयविकाराच्या झटक्याने झाल्याची प्राथमिक माहिती आहे.
गेल्या काही वर्षांपासून सुरवसे हा कोल्हापुरातील तालमीत कुस्तीचा सराव करत होता. दरम्यान, रात्री तालमीत कुस्तीचा सराव करून झाल्यानंतर अंघोळ करत असताना अचानक छातीत दुखू लागल्यानंतर त्याला रूग्णालयात दाखल करण्यात आले. मात्र, उपचारादरम्यान त्याचा मृत्यू झाला.
मयत मारूतीचे वडील वाखरीत शेती करतात. मारूतीला लहानपणापासूनच कुस्तीची आवड होती. कुस्तीमध्ये करियर करण्यासाठी तो कोल्हापूर येथील तालमीत कुस्तीच्या सरावासाठी राहत होता. दरम्यान, या घटनेमुळे तरुणांमध्ये वाढणारा हृदयविकाराचा प्रश्न पुन्हा एकदा ऐरणीवर आला आहे.
