पुणे : पाणलोट क्षेत्रात सतत पडत असलेल्या पावसामुळे आज सायंकाळपासून खडकवासला धरणातून मुठा नदीत विसर्ग सुरू होणार असल्याची माहिती पुणे जिल्हा प्रशासनाने दिली आहे. खडकवासला धरण आज संध्याकाळपर्यंत १०० टक्के भरले जाईल, असे अधिकाऱ्यांनी सांगितले.
खडकवासला धरणातून नदीत पाण्याचा विसर्ग आज सायंकाळी ५ वाजल्यापासून १ हजार क्युसेकने सुरू होणार आहे. नागरिकांना नदीपात्रात न जाण्याचा सल्ला देण्यात आला असून तेथे ठेवलेले प्राणी तसेच इतर साहित्य बाहेर काढावे. सखल भागातील लोकांनी सतर्क राहावे आणि आवश्यक ती खबरदारी घ्यावी”, असे अधिकृत संदेशात सांगितले आहे. पालकमंत्री चंद्रकांत पाटील यांनी देखील याविषयी ट्विट केले आहे.
महत्वाची सूचना
खडकवासला धरण परिसरात होणाऱ्या पावसामुळे धरण १०० टक्के, म्हणजे पूर्ण भरण्याच्या मार्गावर आहे. आज संध्याकाळी ५.०० वाजता धरणातून १ हजार क्युसेक्स पाण्याचा नदीपात्रात विसर्ग करण्यात येणार आहे. तरी, नागरिकांनी नदीपात्रात उतरु नये. नदीपात्रात तत्सम साहित्य किंवा जनावरे…— Chandrakant Patil (@ChDadaPatil) July 25, 2023
पुणे जिल्ह्यातील घाट विभागात गेल्या २४ तासांत मुसळधार पाऊस झाल्याने धरणाच्या पाणीपातळीत वाढ झाली आहे. IMD च्या आकडेवारीनुसार, ताम्हिणी घाट परिसरात गेल्या 24 तासात 230 मिमी पावसाची नोंद झाली आहे, तर लोणावळा येथे 136 मिमी आणि शिरगाव येथे 175 मिमी पावसाची नोंद झाली आहे. IMD ने पुणे जिल्ह्यासाठी 27 जुलैपर्यंत ऑरेंज अलर्ट जारी केला आहे. 25 आणि 27 जुलै रोजी ‘घाट भागात मुसळधार ते अति मुसळधार पाऊस’ तर 26 जुलै रोजी ‘घाट भागात निर्जन ठिकाणी अति मुसळधार पावसाचा’ अंदाज वर्तवण्यात आला आहे.
