पुणे : ज्येष्ठ समाजसेवक डॉ प्रकाश आमटे यांना कॅन्सरच्या उपचारासाठी पुण्यातील दीनानाथ मंगेशकर रुग्णालयात पुन्हा दाखल करण्यात आले आहे. दरम्यान, संक्रमणाचा धोका टाळण्यासाठी रुग्णालयातील कर्मचारी आणि कुटुंबीयांनी बाहेरील लोकांना त्यांना न भेटण्याचे आवाहन केले आहे.
जूनच्या पहिल्या आठवड्यात बीजे मेडिकल कॉलेजच्या पदवीदान समारंभासाठी पुण्यात येत असताना डॉ. आमटे यांना ताप व खोकल्याचा त्रास झाला. त्यांना रुग्णालयात दाखल केले असता त्यांना न्यूमोनिया आणि ल्युकेमिया झाल्याचे निदान झाले. न्यूमोनियातून बरे झाल्यानंतर त्यांना कर्करोगाच्या उपचारासाठी मंगेशकर रुग्णालयात दाखल करण्यात आले आहे. त्यांच्यावर उपचार सुरू आहेत. दरम्यान, डॉ. आमटे यांची प्रकृती उत्तम असून काळजीचे कारण नसल्याची माहिती त्यांच्या निकटवर्तीयांकडून देण्यात आली आहे.
