पुणे : पुणे शहरात पोलीस आयुक्तालयाच्या कार्यक्षेत्रात शांतता व सुव्यवस्था राखण्यासाठी महाराष्ट्र पोलीस अधिनियम 1951 चे कलम 37 (1) आणि (3) अन्वये प्रतिबंधात्मक आदेश जारी करण्यात आले आहेत. हे नियम 28 जून रोजी 1 वाजल्यापासून ते दिनांक 11 जुलै रोजी बारा वाजेपर्यंत 14 दिवसांसाठी लागू राहतील. याबाबत पुणे शहर पोलीस उप-आयुक्त आर. राजा यांनी आदेश जारी केले आहेत.
पुणे शहरात ज्याअर्थी जनतेच्या विविध मागण्यांसाठी विविध राजकीय पक्ष, सामाजिक संघटना मोर्चे, धरणे, निदर्शने, बंद आणि उपोषणासारखे आंदोलन करतात, तसेच अतिक्रमण हटवण्याच्या कारवायांमुळे कायदा व सुव्यवस्थेचा प्रश्न निर्माण होऊ शकतो. त्यामुळे सुव्यवस्था राखण्यासाठी हे आदेश जारी करण्यास पुरेसे आणि सबळ कारण असल्याचे सांगत हे प्रतिबंधात्मक आदेश जारी करण्यात आले आहेत.
14 दिवसांसाठी ही कृत्ये करण्यास मनाई :
- कोणताही दाहक पदार्थ अथवा स्फोटक पदार्थ, ज्वलनशील द्रव पदार्थ बरोबर नेणे.
- दगड अथवा शस्त्र किंवा अस्त्रे तसेच सोडावयाची अस्त्रे किंवा फेकावयाची हत्यारे किंवा साधने बरोबर नेणे, जमा करणे व तयार करणे.
- शस्त्रे, सोटे, भाले, तलवारी, दंड, काठ्या, बंदुका आणि शारीरिक इजा करण्यासाठी वापरण्यात येणारी कोणतीही वस्तू बरोबर नेणे.
- कोणत्याही इसमाच्या चित्रांचे, प्रतीकात्मक प्रेताचे, पुतळ्याचे, पुढाऱ्यांच्या चित्राचे, प्रतीमेचे प्रदर्शन व दहन करणे.
- मोठ्याने अर्वाच्च घोषणा देणे, वाद्य वाजवणे.
- सभ्यता अगर नीतिमत्ता यास धोका पोहोचेल किंवा राज्याची सुरक्षितता धोक्यात येईल किंवा राज्य उलथवून देण्यास प्रवृत्त करेल, अशी आवेशपूर्ण भाषणे करणे किंवा अविर्भाव करणे. कोणतेही जिन्नस तयार करून त्याचा जनतेत प्रसार करणे.
- ज्यायोगे कायदा व सुव्यवस्था धोक्यात येईल, अशा पद्धतीने महाराष्ट्र पोलीस अधिनियम 1951 चे कलम 37 (1) आणि (3) विरुद्ध वर्तन करणे.
वरील सर्व कृत्यांवर पोलिसांमार्फत बंदी घालण्यात आली आहे. या दरम्यान शासन किंवा महानगरपालिका आयुक्त पुणे यांच्या कोरोना विषयक प्रतिबंधक उपाययोजना व मार्गदर्शक तत्वे व त्यातील तरतुदी हे देखील या दरम्यान लागू राहतील. महाराष्ट्र पोलीस अधिनियम 1951 चे 37 पोटकलम (३) नुसार पाच किंवा पाचपेक्षा जास्त लोकांचा जमाव करण्यास बंदी घालण्यात आली आहे. पोलीस आयुक्त पुणे शहर यांच्या पूर्वपरवानगीशिवाय सभा घेण्यास किंवा मिरवणूक काढण्यास बंदी घालण्यात आली आहे. सदर आदेशाचे जर कोणीही उल्लंघन केले तर संबंधित व्यक्ती शिक्षेस पात्र असेल, असे पोलीस उपायुक्त आर. राजा यांनी म्हटले आहे.
