नागपूर : जिल्हा परिषदेच्या माजी सदस्याच्या मुलाने तरुणीवर अत्याचार केल्याची खळबळजनक घटना देवलापार येथे घडली आहे. देवलापार पोलिसांनी या प्रकरणी अत्याचार करणाऱ्या तरुणाविरुद्ध गुन्हा दाखल केला आहे. मात्र, अद्याप या तरुणाला अटक करण्यात आलेली नाही. वैभव राऊत (वय २३) असे या तरुणाचे नाव आहे.
वैभव हा जिल्हा परिषदेचे माजी सदस्य व काँग्रसचे तालुका अध्यक्ष कैलास राऊत यांचा मुलगा आहे. वैभव याने देवलापार परिसरात राहणाऱ्या तरुणीला प्रेमाच्या जाळ्यात अडकविले. ऑक्टोबर २०२० मध्ये त्याने तिला एका रिसॉर्टवर नेले. तेथे तिला चहातून गुंगीचे औषध देऊन तिच्यावर बलात्कार केला. तसेच त्याने मोबाइलद्वारे तरुणीची अश्लील चित्रफित तयार केली. त्यानंतर ही चित्रफित व्हायरल करण्याची धमकी देऊन वैभव याने तिच्यावर वारंवार अत्याचार केले.
काही दिवसांपूर्वी तरुणीने देवलापार पोलिसांत त्याच्याविरुद्ध तक्रार दिली. पोलिसांनी अत्याचार व अनुसूचित जाती-जमाती अत्याचार प्रतिबंधक कायद्यान्वये गुन्हा दाखल करून तपास सुरू केला आहे. मात्र, त्याला अटक न करण्यासाठी दबाव दिला जात असल्याची चर्चा सध्या सुरु आहे.
