पावसाला आवश्यक कमी दाबाचा पट्टा आणि वाऱ्यांची चक्रीय स्थिती सध्या कमकुवत आहे. मात्र, अरबी समुद्रात अनुकूल स्थिती निर्माण होणार असल्याने राज्यातील काही भागात मुसळधार पावसाची शक्यता हवामान विभागाने व्यक्त केली आहे.
३१ जुलैला कोकण, मध्य महाराष्ट्र आणि मराठवाडय़ात काही ठिकाणी मुसळधार पावसाचा इशारा देण्यात आला आहे. त्यानंतर ऑगस्टच्या पहिल्या तीन दिवसांमध्येही कोकणात तुरळक ठिकाणी जोरदार पाऊस, तर मराठवाडा, विदर्भ आणि मध्य महाराष्ट्रात काही ठिकाणी मुसळधार पावसाचा अंदाज आहे. मध्य महाराष्ट्राच्या घाटक्षेत्रावर प्रामुख्याने जोरदार पावसाचा इशारा देण्यात आला आहे.
