मुंबई : अंमली पदार्थ प्रकरणी शौविक चक्रवर्ती आणि सॅम्युअल मिरांडा पाठोपाठ दीपेश सावंत याला अटक, दीपेश हा अंमली पदार्थ प्रकरणी सुरू असलेल्या कारवाईतील सातवी अटक असल्याचे एनसीबीकडून सांगण्यात आले.
सॅम्युअल मिरांडा आणि शौविक चक्रवर्ती या दोघांविरोधात एनडीपीएस कायद्यांतर्गत कलम ८ क, २० ब, २७ अ, २८ आणि २९ आधारे आरोप ठेवले. यात दोषी आढळल्यास दहा वर्षांच्या शिक्षेची तरतूद आहे. सॅम्युअल मिरांडा आणि शौविक चक्रवर्ती विरोधात एनसीबीने अंमली पदार्थांच्या खरेदी-विक्रीचे आर्थिक व्यवहार केल्याचा ठपका ठेवला.
रियाची स्वतंत्रपणे तसेच अटकेतील आरोपींसमोर चौकशी होण्याची शक्यता आहे. आरोपी आणि संशयितांपैकी किती जण सेलिब्रेटींना अंमली पदार्थ पुरवत होते त्याचा तपास होणार आहे. पुढील दोन दिवसांत या प्रकरणात आणखी धरपकड होऊ शकते, असे संकेत एनसीबीने दिले. या निमित्ताने बॉलिवूडमधील अंमली पदार्थांच्या व्यवहारांशी संबंधित नवी माहिती उजेडात येण्याची शक्यता आहे.
