न्यूयॉर्क : न्यूयॉर्कमध्ये कस्टडी न मिळाल्यामुळे चार वर्षांच्या मुलीचे तिच्याच आई-वडिलांनी अपहरण केले आणि तिला दोन वर्षे घरात लपवून ठेवण्यात यश मिळवले, आता ही 6 वर्षांची मुलगी पोलिसांना सापडली आहे. 2019 सालापासून हरवलेली मुलगी न्यूयॉर्कमधील हडसन येथील तिच्या घराच्या पायऱ्यांखाली लपलेली आढळली. जवळपास दोन वर्षांपासून बेपत्ता असलेली मुलगी घरातील जिन्याखाली बांधलेल्या एका खास खोलीत सापडली. मुलीची तब्येत चांगली आहे. दरम्यान, या मुलीचे तिच्या आई-वडिलांनीच अपहरण केल्याचे समजते.
मिळालेल्या माहितीनुसार, पोलिसांनी पॅस्ले शल्टिस नावाच्या सहा वर्षांच्या मुलीला, सागरटीस शहरातील एका घराच्या पायऱ्यांखालील एका चेंबरमधून बाहेर काढले. मुलगी सुखरूप आहे. पॅस्लेचे अपहरण तिचेच आई-वडिल किम्बर्ले कूपर आणि कर्क शल्टिस यांनी केले होते. या दोघांनाही मुलीला सोबत ठेवण्याचा कायदेशीर अधिकार नाही. 2019 मध्ये तिची कस्टडी न मिळाल्यामुळे पॅस्लेचे त्यांनीच अपहरण केले होते. पोलिसांचे म्हणणे आहे की, अपहरणानंतर पॅस्लेला घरातील एका गुप्त खोलीत ठेवण्यात आले होते, जी खोली अतिशय लहान, थंड आणि ओलसर होती.
दरम्यान, सोमवारी पोलिसांना मुलीबाबत सुगावा लागला. त्यानंतर त्यांनी सर्च वॉरंट घेऊन घराची झडती घेतली. पोलिसांनी सांगितले की, तपासासाठी विशेष प्रकारचे साधन वापरले गेले होते, जे अनेक लाकडी पायऱ्या काढण्यासाठी आवश्यक होते. याच्या मदतीने तासाभराच्या प्रयत्नानंतर त्यांना पायऱ्यांखाली छोटे-छोटे ठसे दिसले. त्यांनी तात्काळ शोध घेतला आणि त्यांना तिथे मुलगी पॅस्ले आणि तिची 33 वर्षीय आई सापडली. पोलिसांनी मुलीच्या आई-वडिलांना आणि आजोबांना अटक करून मुलीला तिच्या कायदेशीर पालकांच्या ताब्यात दिले.
